Solapur News : जिल्ह्यात गाळप हंगाम २०२३-२४ मध्ये जिल्ह्यातील साखर कारखान्यांनी गाळप केलेल्या उसाची बिले मोठ्या प्रमाणात थकविली आहेत. त्यामुळे स्वाभिमानी शेतकरी संघटनेच्या वतीने सोलापुरात साखर सहसंचालक कार्यालयासमोर शुक्रवारी (ता. ९) धरणे आंदोलन करण्यात आले.

‘स्वाभिमानी’चे युवा जिल्हाध्यक्ष विजय रणदिवे यांच्या नेतृत्वाखाली हे आंदोलन झाले. साखर सहसंचालक प्रकाश आष्टेकर व उपसहसंचालक पांडुरंग साठे यांनी संबंधित साखर कारखान्याशी संपर्क करून या आंदोलनात सहभागी असलेल्या शेतकऱ्यांची ऊसबिले तत्काळ जमा करण्यास सांगितले.

आंदोलनात स्वाभिमानचे इक्बाल मुजावर, पप्पू पाटील, शहाजी सोमवंशी, मोहसिन बिराजदार, बिळ्यांनी सुंटे, दत्तात्रय पांढरे, नितीन मस्के, श्रीपती ढुणे यांच्यासह शेतकरी उपस्थित होते. कायद्यानुसार उसाचे गाळप झाल्यापासून १४ दिवसांत ऊसबिले देणे बंधनकारक असतानाही जिल्ह्यातील बहुतांश साखर कारखान्यांनी मागील सहा महिन्यांपासून ऊस बिले जमा केलेली नाहीत.

या वर्षी जिल्ह्यातील दुष्काळी परिस्थितीमुळे ऊसदराची स्पर्धा करून कारखाने दहा दिवसांत बिले जमा करतील, असे शेतकऱ्यांना वाटत असतानाच साखर कारखान्यांनी मोठ्या प्रमाणात बिले थकविली आहेत.

काही साखर कारखाने एफआरपीपेक्षा जास्त पैसे दिले असे सांगत आहेत. मात्र प्रत्यक्षात शेतकऱ्यांना ऊसबिले अदा केलेली नाहीत. तरी शेतकऱ्यांची थकित ऊसबिले लवकर जमा करण्यास साखर कारखानदारांना भाग पाडावे, या मागणीसाठी धरणे आंदोलन करण्यात आले.