Parbhani News : राज्य अर्थसंकल्प व शक्तिपीठ महामार्ग अधिसूचनेच्या प्रती या होळीत जाळून गुरुवारी (ता. १३) परभणी येथे स्वाभिमानी शेतकरी संघटनेकडून सरकारच्या शेतकरी विरोधी धोरणांचा जाहीर निषेध करण्यात आला. 

विधानसभा निवडणूक प्रचारात शेतकऱ्यांच्या सोयाबीनला प्रतिक्विंटल ६००० रुपये, तर कापसाला प्रतिक्विंटल ९००० रुपये भाव देऊ, संपूर्ण कर्जमाफी करू, शक्तिपीठ महामार्ग रद्द करणार यासारखे शेतकरी हिताचे आश्वासने दिले शेतकऱ्यांनी भर भरून मते दिली.

सरकार बहुमतांनी निवडून आले. मुख्यमंत्री झाल्यावर देवेंद्र फडणवीस यांनी शेतकरी मारक धोरण राबविण्यास सुरुवात केली. सोयाबीनला सहा हजार भाव तर सोडाच साधा हमीभाव सुद्धा मिळत नाही‌ संपूर्ण सोयाबीन नाफेडच्या मार्फत खरेदी करणार म्हणाले. खरेदी बंद केल्यामुळे सोयाबीनचे भाव ३५०० रुपयांपर्यंत कोसळले आहेत.

कापूस, तूर, हरभरा यांचे देखील दर कमी झाले आहेत. शेती पिकांचा उत्पादन खर्च भरून निघत नसल्याने शेती व्यवसाय तोट्याचा झाला आहे. मराठवाडा व विदर्भात सर्वांत जास्त शेतकरी आत्महत्या होत आहेत. कर्ज मुक्त करतो म्हणून दिलेला शब्द पाळायला तयार नाही. अर्थसंकल्पात त्यासाठी तरतूद देखील करण्यात आली नाही.‌

सरकारच्या चुकीच्या धोरणांचा होळीमध्ये दहन करत आहोत. शेतकरी विरोधी धोरण अवलंबू नये. महाराष्ट्रातल्या शेतकऱ्यांची संपूर्ण कर्जमुक्ती तत्काळ करावी. शक्तिपीठ महामार्ग रद्द करावा. या मागण्यांसाठी जिल्हाधिकारी कार्यालयासमोर सरकारच्या शेती विरोधी धोरणाची होळी केली.

स्वाभिमानी शेतकरी संघटनेचे जिल्हाध्यक्ष किशोर ढगे, रामप्रसाद गमे, प्रसाद गरुड, गजानन तुरे, सय्यद कलिम, पी. टी. निर्वळ, जगन्नाथ जाधव, किशन शिंदे, कारभारी जोगदंड, विकास भोपळे, गजानन दुगाणे, सतीश दुगाणे, विठ्ठल चोखट, नामदेव काळे, दत्ता परांडे, रणजित चव्हाण आदी उपस्थित होते.