Kolhapur News : जिल्ह्यातील ऊस उत्पादक शेतकऱ्यांचे एफआरपीचे थकित १३५ कोटी रुपये व्याजासह शेतकऱ्यांच्या खात्यावर १५ दिवसांत जमा करावे त्याबरोबरच कोल्हापूर जिल्ह्यात सुरू असलेले बोगस व लिंकिंग खतांची विक्री करणाऱ्या कंपन्यावर कडक कारवाई करण्याची मागणी स्वाभिमानी शेतकरी संघटनेच्या वतीने जिल्ह्याचे पालकमंत्री प्रकाश आबिटकर यांच्याकडे जिल्हाधिकारी कार्यालयात भेट घेऊन करण्यात आली.

ज्या सरकारकडून बेकायदेशीर कायदा करून साखर कारखानदार ऊस उत्पादक शेतकऱ्यांना दोन किंवा तीन टप्प्यांत एफआरपी अदा करत होते. यामुळे ऊस तुटल्यापासून एक-एक वर्षापर्यंत शेतक-यांना त्यांची रिकव्हरीनुसार मिळणारी हक्काची एफ. आर. पी. मिळत नव्हती.याचाच गैरफायदा घेऊन कोल्हापूर विभागातील कारखानदार जवळपास १३५ कोटी रुपयांची एफआरपी थकित ठेवली आहे.

याबरोबरच जिल्ह्यांमध्ये युरीया व इतर खतांची टंचाई भासवून लिंकिंग केले जात आहे. जिल्ह्यातील खत विक्री करणा-या किरकोळ विक्रेते दुकानदार यांचेवर कारवाई करण्याचा फार्स विभागाकडून केला जातो. बोगस खत विक्री व लिंकिंगमध्ये कृषी विभागातील अधिकारी व संबधित कंपन्यांचे आर्थिक हितसंबंध असल्याने संबधित खत कंपनीवर कारवाई करण्याऐवजी स्थानिक दुकानदार यांचेवर कारवाई करून पिळवणूक केली जात आहे. यापुढे संबधित दुकानात बोगस खते व लिंकिंगची खते विक्री सापडल्यास संबंधित कंपनीवर गुन्हे दाखल करण्याची मागणी ‘स्वाभिमानी’ने केली.

आबिटकर यांनी, आठवड्याभरात जिल्ह्यातील कारखान्यांनी थकित एफआरपी न दिल्यास आरआरसीची कारवाई करण्यास भाग पाडू. तसेच बोगस व लिंकिंग खत कंपन्यांविरोधात जिल्हाधिकारी व जिल्हा कृषी अधीक्षक यांना सूचना देऊन फिरत्या पथकाच्या धाडी टाकण्याचे आदेश दिले.

त्याबरोबरच ज्या कंपन्या लिंकींगची सक्ती करतील त्यांच्यावर कारवाई करणार असल्याचे आबिटकर यांनी सांगितले. या वेळी जिल्हाध्यक्ष अजित पोवार, धनाजी पाटील, बाळासाहेब पाटील, राजाराम देसाई, सचिन शिंदे, संपत पवार, बंडू पाटील, सुधीर मगदूम, तानाजी वठारे, विशाल चौगुले, अण्णा मगदूम, अप्पा एडके, विक्रम पाटील, विजय कर्वे, विवेक चौगुले यांच्यासह ‘स्वाभिमानी’चे पदाधिकारी उपस्थित होते.