Solapur News : पीक विमा कंपनीकडून जिल्ह्यात ड्रोनद्वारे सर्व्हे सुरू झाला असून शुक्रवारी वाळूज (ता. मोहोळ) येथून प्रारंभ झाला. पीक विमा कंपनीने जिल्ह्यातील पाच गावांची यासाठी निवड केली असून स्थानिक प्रशासन व शेतकरी मात्र याबाबत अनभिज्ञ आहेत.

जिल्ह्यात पावसाने २१ दिवसांपेक्षा अधिक दिवस खंड पडला असल्याने यापूर्वीच जिल्हाधिकारी कुमार आशीर्वाद यांच्या आदेशानुसार विमा कंपनी, शेतकरी व कृषी सहायक यांनी संयुक्त पीक पाहणी केली आहे. तरीही पीकविमा कंपनीने निवडक गावांचा ड्रोन सर्व्हे सुरू केल्याने शेतकरी हवालदिल झाला आहे.

('ॲग्रोवन'चं व्हॉट्सअ‍ॅप चॅनल जॉईन करण्यासाठी येथे क्लिक करा)

या सर्व्हेतून कंपनी कोणता अहवाल पाठविणार व  २५ टक्के नुकसान भरपाई मिळण्याबाबत त्याचा काय परिणाम होणार यावरून शेतकऱ्यांमध्ये सध्या चर्चा सुरू झाली आहे. वीमा कंपनी वाळूज (ता. मोहोळ) येथील संपूर्ण शिवाराचा ड्रोन सर्व्हे केला असून यासाठी स्वतंत्र पथक आहे. कंपनीचे काही कर्मचारी गावाच्या सर्व शिवारातून ड्रोनद्वारे व्हिडीओ चित्रिकरण करत आहेत.

या सर्व्हेसाठी मोहोळ तालुक्यातील वाळूजची या एकाच गावाची निवड केली असून शुक्रवारी सर्व्हे पूर्ण झाला आहे. बार्शी तालुक्यातील मळेगाव, पांगरी व मालेगाव व अक्कलकोट तालुक्यातील एका गावाचा समावेश आहे.