Malinagar News : माळीनगर कारखान्याचा गेल्यावर्षीचा हंगाम सर्वांच्या सहकार्याने व्यवस्थित पार पडला. यंदाच्या हंगामातही शेतकऱ्यांनी कारखान्यास ऊस देऊन सहकार्य करावे, असे आवाहन दि सासवड माळी शुगर फॅक्टरीचे व्यवस्थापकीय संचालक सतीश गिरमे यांनी केले.

कारखान्याच्या ९१ व्या गळीत हंगामाचे बॉयलर अग्निप्रदीपन सेवानिवृत्त कामगार दीपक थोरात व धनंजय फडणीस यांच्या हस्ते विधिवत होमहवन करून झाले. कारखान्याच्या संस्थापकांच्या स्मृतींना स्मरण करत कारखान्याच्या आवारातील त्यांच्या पुतळ्यांना सकाळी पुष्पहार अर्पण करून अभिवादन करण्यात आले.

कारखान्यातील सेवानिवृत्त कामगारांचा भेटवस्तू देऊन याप्रसंगी सन्मान करण्यात आला. व्यवस्थापकीय संचालक गिरमे म्हणाले, की सभासदांच्या विश्वासाचे बळच, कारखान्याच्या प्रगतीतला महत्त्वाचा वाटा आहे, हा विश्वास असाच दृढ ठेवा, असेही ते म्हणाले.

यावेळी पूर्णवेळ संचालक परेश राऊत, उपाध्यक्ष निखिल कुदळे, संचालक मोहन लांडे, राहुल गिरमे, यश बोरावके, विशाल जाधव, निळकंठ भोंगळे, इंडिपेंडट डायरेक्टर राजीव देवकर, माजी संचालक हेमंत रासकर, समीर पांढरे,‘शुगरकेन’चे अध्यक्ष अमोल ताम्हाणे, संचालक कुणाल इनामके,

दि. सासवड माळी एज्युकेशन सोसायटीचे सचिव अजय गिरमे, संचालक रत्नदीप बोरावके, डॉ. अविनाश जाधव, कल्पेश पांढरे, पृथ्वीराज भोंगळे आदी उपस्थित होते. विवेक देशमाने यांनी सूत्रसंचालन करून आभार मानले.