Nashik News : नियमित सरावासाठी ४ जून २०२४ रोजी उड्डाण केलेले लष्कराचे ‘सुखोई एस बी १८२’ हे लढाऊ विमान निफाड तालुक्यातील शिरसगाव शिवारात कोसळले होते. या विमान दुर्घटनाग्रस्त शेतकऱ्यांच्या द्राक्ष बाग, कोथिंबीर, टोमॅटो पीक लागवड क्षेत्रासह विहिरीचे नुकसान झाले होते.

आता तब्बल दहा महिन्यांनंतर हिंदुस्तान एरोनॉटिक्स लिमिटेड(एचएएल) कडून शिरसगाव येथील विमान दुर्घटनाग्रस्त तीन शेतकऱ्यांना ३२ लाखांची मदत थेट खात्यावर सुपूर्द करण्यात आली आहे. निफाड तालुक्यातील शिरसगाव वडाळीनजीक शिवारात ‘सुखोई एसबी १८२’ या विमानात तांत्रिक बिघाड झाल्याने ते कोसळले होते.

४ जून २०२४ ला दुपारी एक वाजून दहा मिनिटांनी ही घटना घडली होती. विमान कोसळताच त्यास आग लागल्याने धुराचे लोळ उंचीवर गेल्याने परिसरातील शेतकऱ्यांच्या द्राक्षबागेसह टोमॅटो, कोथिंबीर पीकक्षेत्र व विहिरीचे नुकसान झाले होते.

एचएएल प्रशासनाकडून घटनेचा आढावा घेत नुकसानीचे पंचनामे केले होते. प्रशासनाकडून नुकसानग्रस्त शेतकरी सुखदेव मोरे यांच्या द्राक्षशेतीचे नुकसान झाल्याने त्यांना २६ लाख रुपये मदत मिळाली.

ज्ञानेश्वर मोरे या शेतकऱ्याचे टोमॅटो पिकासह विहिरीचे नुकसान झाल्याने त्यांना ५ लाख ८० हजारांची मदत देण्यात आली. लक्ष्मण मोरे यांच्या कोथिंबीर पिकाचे नुकसान झाल्याने त्यांना ७३ हजारांची मदत ‘एचएएल’ प्रशासनाकडून थेट खात्यावर सुपूर्द करण्यात आली.