Kolhapur News : कोल्हापूर जिल्ह्यातील गडहिंग्लज तालुक्यात एका तरूण शेतकऱ्याच्या बाबतीत धक्कादायक प्रकार समोर आला आहे. त्रास दिलेल्यांची नावे गोठ्यातील भिंतीवर कोळशाने लिहत तरुण शेतकऱ्याने आत्महत्या केली.

सिद्धेश्वर रामचंद्र कानडे असे त्याचे नाव आहे. काल (ता.०९) दुपारी अडीचच्या सुमारास ही घटना उघडकीस आली. दरम्यान या घटनेने भागात जोरदार चर्चा सुरू होती.

गडहिंग्लज तालुक्यातील औरनाळ बसथांब्यानजीक राहणारा सिद्धेश्वर कानडे हा शेतीबरोबरच भाजीपाला व फळे विक्रीचा व्यवसाय करायचा. परंतु कर्जाचे डोंगर वाढल्याने नैराश्य पत्करून तो दारूच्या खूप आहारी गेला. या सगळ्यात त्याच्या पत्नीनेही त्याची साथ सोडत मुलांसह माहेरी राहत होती.

सोमवारी दपारी आई बाजारासाठी गडहिंग्लजला गेली होती. त्यावेळी घरी कुणी नसल्याचे पाहून त्याने राहत्या घरालगतच्या जनावरांच्या गोठ्यातील तुळईला दारूच्या नशेतच दोरीने गळफास लावून घेतला.

दरम्यान, बाजार करून आल्यानंतर त्याची आई जनावरांना वैरण टाकण्यासाठी गेली होती. त्यावेळी सिद्धेश्वर याने आत्महत्या केल्याचे निदर्शनास आले. त्याच्या पश्चात पत्नी, मुलगा, मुलगी, बहीण असा परिवार आहे. याबाबत गडहिंग्लज पोलिसांत गुन्ह्याची नोंद झाली पोलीस पुढील तपास करत आहेत.

उत्तर येथील दूध संस्था, गडहिंग्लज येथील महिलेसह दुंडगे व गडहिंग्लज येथील एका तरुणाच्या त्रासाला कंटाळून आपण आत्महत्या करीत असल्याचे सिद्धेश्वर याने गोठ्यातील भिंतीवर कोळशाने लिहून ठेवले असल्याची चर्चा घटनास्थळी होती.