Sangli News : शेतकऱ्यांनी जमिनीची जडणघडण समजून घेण्यासाठी माती परीक्षण केले पाहिजे. माती परीक्षण करूनच खत व्यवस्थापन केले पाहिजे. तसेच जमिनीचा सेंद्रिय कर्ब वाढीसाठी पाचट व्यवस्थापनासह शेखणत, हिरवळीची खतांचा वापर केल्याने सेंद्रिय कर्ब वाढीस मदत होते, असे मत कृषी विज्ञान केंद्राचे वरिष्ठ शास्त्रज्ञ व प्रमुख डॉ. जयवंत जगताप यांनी व्यक्त केले.

वाटेगाव (ता. वाळवा) येथे ॲग्रोवन व रिवुलिस इरिगेशन इ. प्रा. लि. यांच्या संयुक्त विद्यमाने ऊस उत्पादन तंत्रज्ञान व पाणी व्यवस्थापन या विषयावर ‘ॲग्रो संवाद’चे चर्चासत्र झाले. या वेळी डॉ. जगताप बोलत होते. या वेळी रिवुलिस इरिगेशन इ. प्रा. लि.चे विभागीय व्यवस्थापक सागर पिसे, वैभव चौगुले, वितरक विकास पाटील, धीरज चव्हाण यांच्यासह शेतकरी उपस्थित होते.

डॉ. जगताप म्हणाले, की शेतकऱ्यांनी माती परीक्षण करूनच खत व्यवस्थापन केले पाहिजे. त्यामुळे पिकाला गरजेनुसार खतांची उपलब्धता होते. दर्जेदार बेणे, रुंद सरीचा वापर करणे आवश्यक आहे.

त्यामुळे सरी रुंद असल्याने प्रकाश संश्लेषण, हवा खेळती रहात, अन्नद्रव्ये अधिक तयार होते. यामुळे उसाच्या कांड्याची जाडी, लांबी वाढण्यास मदत होते. पिकांची फेरपालट, गांडूळ खत, शेणखत, कोंबडी खतासह पाचट माती आड केल्याने जमिनीचा सेंद्रिय कर्ब वाढीस मदत होते.

रिवुलिस इरिगेशन इं. प्रा. लि.चे वरिष्ठ कृषी शास्त्रज्ञ नितीन जाधव म्हणाले, की आमच्या कंपनीने जगातील १२० पेक्षा अधिक देशांमध्ये काम केले आहे. इस्राईलस्थित असणाऱ्या कंपनीने उपग्रहाद्वारे पीकपाणी नियोजन विकसित केले आहे. मान्ना इरिगेशन अॅपद्वारे शेतकऱ्यांना विविध सुविधा दिल्या आहेत.

शेतकऱ्यांना पाणी बचतीसाठी योग्य ते मार्गदर्शन या अॅपद्वारे केले जाते. अत्याधुनिक तंत्रज्ञानयुक्त रिवुलिसचा ड्रीपरचा दर्जा चांगला असल्याने पिकाच्या गरजेनुसार पाण्याचा सर्वदूर एकसमान विसर्गाची खात्री रिवुलिसद्वारे दिली जाते. अभिजित डाके यांनी प्रास्ताविक केले. दत्ता कोळी यांनी आभार मानले.