Jalgaon News : खानदेशात ऊस लागवडीत मागील हंगामात काहीशी वाढ झाली. ही लागवड सुमारे २७ हजार हेक्टरवर पोचली आहे. सर्वाधिक १४ हजार हेक्टरवर लागवड जळगाव नंदुरबार जिल्ह्यात झाली आहे. तसेच नंदुरबार जिल्ह्यात सुमारे १२ हजार हेक्टरवर आणि धुळ्यात चार हजार हेक्टरवर ऊस लागवड झाल्याची माहिती आहे.

लागवड काही भागात सुरूच आहे. आणखी सुमारे ५०० ते ६०० हेक्टरवर लागवड होईल. परंतु कमाल शेतकऱ्यांची लागवड किंवा लागवड नियोजन पूर्ण झाले आहे.

नंदुरबार जिल्ह्यात साखर कारखाने अधिक कार्यरत आहेत. शिवाय मध्य प्रदेश, गुजरातमधील कारखानेदेखील खरेदी करतात. यामुळे नंदुरबारात लागवड अधिक आहे. शिवाय तापी, सुसरी नदीच्या लाभक्षेत्रात जलसाठे मुबलक आहेत.

इतर पिकांची स्थिती बेभरवशाची झाली आहे. अनेकदा दरही परवडत नाहीत. यामुळे शेतकरी उसाकडे वळत आहेत. धुळ्यातही शिरपूर, धुळे, साक्री तालुक्यात ऊस पीक आहे. धुळ्यातून मध्य प्रदेश, नाशिक भागातील कारखाने उसाची खरेदी करतात. यामुळे या भागात ऊस पिकाची लागवड किंचित वाढली आहे.

जळगाव जिल्ह्यात चोपडा, चाळीसगाव तालुक्यात अधिकची ऊस लागवड झाली आहे. तसेच यावल, मुक्ताईनगर भागातही ऊस लागवड स्थिर आहे. ऊस लागवड खानदेशात गेले दोन वर्षे वाढली आहे. कारण पाऊस चांगला किंवा सरासरीपेक्षा अधिक झाला आहे.

ऊस पिकात चांगले वाण, ठिबकची यंत्रणादेखील बऱ्यापैकी उत्पादनदेखील शेतकरी घेवू शकत आहेत. जळगाव जिल्ह्यातही तीन खासगी कारखाने सुरू आहेत. पुढे न्हावी (ता.यावल) येथील मधुकर कारखानादेखील सुरू होईल, अशी अपेक्षा आहे.

यामुळे ऊस लागवड वाढत आहे. चाळीसगाव, भडगाव, पाचोरा भागात नाशिक, औरंगाबाद, नगरमधील कारखाने खरेदी करतात. शिवाय भोरस येथेही साखर कारखाना सुरू झाला आहे.