Narayangaon News : वीजवाहक तारांमध्ये झालेल्या घर्षणातून ठिणग्या पडल्याने काढणीस आलेल्या अडीच एकर उसाला आग लागून उसासह ठिबक सिंचनचे साहित्य, फळझाडे जळून खाक झाल्याची घटना वारूळवाडी येथील शेतकरी दत्तात्रय बनकर यांच्या शेतात मंगळवारी (ता. १७) घडली. यामध्ये सुमारे दहा लाख रुपयांचे नुकसान झाल्याचा प्राथमिक अंदाज आहे.

महावितरण कंपनीचे शाखा अभियंता बी. एस. बिराजदार, अखिल भारतीय शेतकरी संघटनेचे जिल्हा अध्यक्ष प्रमोद खांडगे, सह्याद्री शेतकरी संघटनेचे अध्यक्ष रमेश शिंदे यांनी बुधवारी (ता. १८) घटनास्थळी भेट देऊन नुकसानीची पाहणी केली.

शेतकरी दत्तात्रय बनकर यांनी अडीच एकर क्षेत्रात उसाची लागवड केली होती. उसाचे पीक तेरा महिन्यांचे झाले होते. या हंगामात ऊस तोडणीस जाणार होता. त्यांच्या उसाच्या शेतात रोहित्र असून या रोहित्राला जोडलेल्या वीज वाहक तारा शेतात लोंबकळलेल्या आहेत. मंगळवारी दुपारी वीजवाहक तारांमधील शॉर्टसर्किटमुळे ठिणग्या उसाच्या शेतात पडल्याने उसाचे उभे पीक जळाले. त्याबरोबरच शेतातील ठिबक सिंचनच्या नळ्या, पाइप, बांधावरील आंब्याची झाडे जळून सुमारे दहा लाखांचे नुकसान झाले.

याबाबत शेतकरी सुधीर बनकर म्हणाले, की शेतातील रोहित्र व लोंबकळलेल्या वीज वाहक तारा धोकादायक आहेत. या ठिकाणी वारंवार स्पार्किंग होत असते. यापूर्वीही तीन वेळा शॉर्टसर्किटमुळे लागलेल्या आगीत उसाचे उभे पीक जळून नुकसान झाले आहे. महावितरण कंपनीकडून कोणतीही नुकसान भरपाई अद्याप मिळालेली नाही. वारंवार मागणी करूनही धोकादायक रोहित्र बदलले जात नाही. आमच्या नुकसानीला संपूर्णपणे महावितरण कंपनी जबाबदार आहे.