ॲग्रोवन वृत्तसेवा
Kolhapur News : कोल्हापूर ः केंद्र सरकारने जानेवारी महिन्‍यासाठी २३ लाख टनांचा साखर कोटा गुरुवारी (ता. २८) जाहीर केला. अन्न व सार्वजनिक वितरण विभागाने एक्स (ट्विटर) या सोशल प्लॅटफार्मवरून हा कोटा जाहीर केला. हा कोटा देशातील साखर कारखान्यांना विभागून देण्यात येणार आहे.
दोन महिन्यांपूर्वी केंद्राने पंधरा-पंधरा दिवसांचे कोटे कारखान्यांना दिले होते.

डिसेंबरमध्‍ये २४ लाख टनांचा साखर कोटा दिला होता. यात १ लाख टनांनी घट करीत केंद्राने हा साखर कोटा २३ लाख टनांपर्यंत कायम ठेवला आहे. नोव्हेंबरमध्येही २३ लाख टनांचा कोटा दिला होता. सध्या देशाचा हंगाम वेगात सुरू झाला आहे.

देशभरात ऑक्टोबरपासून यंदाचा हंगाम सुरू झाला. महाराष्ट्र व कर्नाटकमध्ये नोव्‍हेंबरच्‍या उत्तरार्धापासून तोडणीस गती आल्‍यानंतर साखर उत्पादनास वेग आला. गेल्या वर्षीच्या तुलनेत यंदा साखर उत्पादन कमी होण्‍याच्या शक्यतेने केंद्राने निर्यातबंदीबरोबर इथेनॉल निर्मितीवरही बंधने आणली.

याचबरोबर देशात साखरेची टंचाई होऊ नये यासाठी पंधरा-पंधरा दिवसांचे कोटे जाहीर केले. जानेवारीसाठी मात्र पूर्ण महिन्‍याचा कोटा दिला आहे. सध्‍या तरी देशातील हंगाम चांगला असल्याने पुढील दोन महिन्यांत तरी साखरेची टंचाई जाणवणार नाही, असा अंदाज साखर उद्योगातील सूत्रांनी व्यक्‍त केला.