Hingoli News : महाराष्ट्र धारण जमिनीचे तुकडे पाडण्यास प्रतिबंध करण्याबाबत व त्यांचे एकत्रीकरण करण्याबाबत अधिसूचना प्रसिद्ध झाली आहे.

या अधिसूचनेत ग्रामीण घरकुल बांधकामासाठी लाभार्थ्याला कमाल ५०० चौरस फुटापर्यंत हस्तांतरण करण्यासाठी जिल्हाधिकारी मंजुरी देऊ शकतील, असे नमूद आहे.

त्यानुसार अधिकार उपविभागीय अधिकाऱ्याकडे वर्ग करीत असल्याचे आदेश जिल्हाधिकारी जितेंद्र पापळकर यांनी ३० जानेवारी रोजी काढलेल्या आदेशान्वये दिले आहेत.

वसमतच्या उपविभागीय अधिकाऱ्यांनी घरकुलासाठी एक गुंठा जमीन खरेदी करण्यासाठी अर्जदार उपविभागीय अधिकारी कार्यालयात तगादा करीत आहे. त्यामुळे शासन अधिसूचना १४ जुलै २०२३ मधील जिल्हाधिकाऱ्यांचे अधिकार उपविभागीय अधिकाऱ्यांना प्रदान करावेत, अशी विनंती केली होती.

त्यानुसार महसूल व वन विभागाकडील अधिसूचना १४ जुलै २०२३ (२ घ) (ख) नुसार जिल्हाधिकाऱ्यांचे अधिकार हिंगोली जिल्ह्यातील सर्व उपविभागीय अधिकारी अधिसूचनेतील तरतुदी आणि नियमात विहित केलेल्या शर्तीस अधीन राहून वर्ग करीत असल्याचे आदेश जिल्हाधिकारी जितेंद्र पापळकर यांनी दिले आहेत.