Bharat Pathankar : चांदोली प्रकल्पग्रस्तांना २१५ हेक्टर जमीन ३ महिन्यांत देण्यात येईल, उर्वरित ३१८ हेक्टर जमीन पुढील ६ महिन्यांनंतर देण्याचा निर्णय जिल्हाधिकारी अमोल येडगे यांच्या अध्यक्षतेखाली झालेल्या बैठकीत झाला. श्रमिक मुक्ती दलाचे नेते डॉ. भारत पाटणकर यांच्या उपस्थितीत बैठक झाली.

दरम्यान, अन्य मागण्यांना मंत्रालयातून जोपर्यंत मंजुरी येत नाही तोपर्यंत आंदोलन मागे घेणार नाही, शिवाय २७ फेब्रुवारीनंतर केव्हाही आम्ही मूळ गावी प्रयाण करण्याचा इशाराही डॉ. पाटणकर यांनी दिला.

प्रकल्पग्रस्तांतर्फे वनविभागाच्या कार्यालयासमोर ठिय्या आंदोलन सुरू आहे. त्या पार्श्वभूमीवर जिल्हाधिकारी येडगे यांच्यासमवेत बैठक झाली. प्रकल्पग्रस्तांचे समाधान न झाल्याने आंदोलन सुरूच ठेवण्याचा निर्णय झाला.

बैठकीत डॉ. पाटणकर यांनी जमीन वाटप, घरकुल अनुदान, पुनर्वसित वसाहतीत सुविधा देण्याच्या मागण्या मांडल्या. घरबांधणी अनुदान, लाभक्षेत्रातील जमीन वाटप व प्रकल्पग्रस्त दाखले याविषयी मंत्रालयातून स्पष्टीकरण मागविल्याचे पुनर्वसन अधिकाऱ्यांनी सांगितले. यावर अपर जिल्हाधिकाऱ्यांनी ज्यांना तातडीने दाखले हवे आहेत त्यांची नावे द्या, त्यांना एका दिवसांत दाखले देतो असे सांगितले.