Parbhani News : मातीच्या आरोग्यावरच मानव, वनस्पती, पशुपक्षी यांचे आरोग्य अवलंबून आहे. या सर्व घटकांचे आरोग्य चांगले रहाण्यासाठी सेंद्रिय शेती हा पर्याय आहे. सेंद्रिय शेतीबाबत शेतकऱ्यांमध्ये जागरुकता वाढवत आगमी काळात टप्प्याटप्प्याने सेंद्रिय शेतीखालील क्षेत्राचा विस्तार १ लाख हेक्टरपर्यंत पोहोचण्यासाठी प्रयत्न करावेत, असे प्रतिपादन कुलगुरू डॉ. इंद्र मणी यांनी शनिवारी (ता.१७) केले.

वसंतराव नाईक मराठवाडा कृषी विद्यापीठातील सेंद्रिय शेती संशोधन व प्रशिक्षण केंद्रातर्फे आयोजित पाचदिवसीय सेंद्रिय शेती प्रशिक्षणाच्या समारोप प्रसंगी शनिवारी (ता. १७) झाला. या वेळी कुलुगुरू डॉ. इंद्र मणी दूरदृश्‍य प्रणालीद्वारे बोलत होते.

संशोधन संचालक डॉ. दत्तप्रसाद वासकर, कृषी महाविद्यालयाचे प्राचार्य डॉ. सय्यद इस्माईल, कृषिभूषण सूर्यकांतराव देशमुख झरीकर, कोरडवाहू शेती संशोधन प्रकल्पाचे प्रमुख शास्त्रज्ञ डॉ. वासुदेव नारखेडे, सेंद्रिय शेती संशोधन व प्रशिक्षण केंद्राचे मुख्य संशोधक डॉ. आनंद गोरे, डॉ. पपिता गौरखडे, प्रा. प्रीतम भुतडा, भूषण निकम, इरफान शेख आदी उपस्थित होते.

डॉ. वासकर म्हणाले, की सेंद्रिय शेतीची सुरुवात छोट्या क्षेत्रावर करावी. बाजारपेठेचा अंदाज घेऊन सेंद्रिय शेती करणे आवश्यक आहे. प्रमाणीकरण केल्यानंतर सेंद्रिय शेतीमालाच्या विक्रीसाठी संघटनात्मकरीत्या बाजारपेठ काबीज करणे आवश्यक आहे. कृषिभूषण देशमुख म्हणाले,

की माती जिवंत ठेवण्यासाठी, समाजाला रसायन अवशेषमुक्त शेतीमाल देण्यासाठी शेतकऱ्यांनी गटाने एकत्र येऊन व्यावसायिक दृष्टिकोनातून सेंद्रिय शेती करावी. निकम म्हणाले, की सेंद्रिय शेतीमाल उत्पादनासोबत मूल्यवर्धनासाठी प्रक्रिया उद्योगाची उभारणी आवश्यक आहे. शेतकरी उत्पादक कंपन्यामार्फत ते शक्य आहे. या वेळी प्रशिक्षणार्थींना प्रमाणपत्राचे वितरण मान्यवरांच्या हस्ते करण्यात आले. मराठवाड्यातील विविध जिल्ह्यातील शेतकरी यात सहभागी झाले होते.