Chh. Sambhajinagar News : जिल्ह्यातील लोहगाव मंडळात वादळी वाऱ्यासह आलेला पाऊस व अधून मधून झालेल्या तुरळक गारपिटीने फळ पिकांचे मोठे नुकसान झाले. याशिवाय बीड व जालना जिल्ह्यातील काही ठिकाणी पावसाची हजेरी लागली. पूर्व मोसमी आणि मोसमी पावसाच्या संगमामुळे काही भागात पेरण्यांना सुरुवात झाली आहे.

पैठण तालुक्यातील लोहगाव महसूल मंडळात सायंकाळी जोरदार वादळीवाऱ्यासह मृग नक्षत्राच्या पहिल्या पावसाने दमदार हजेरी लावली. गारासह वादळी पावसामुळे मुलांनी वाडगाव, ढाकेफळ शिवारातील केळी बागा आडवी झाली.तर अनेक झाडे वीज पोल कोसळल्याने वीज पुरवठा खंडित झाला.

वादळी पावसाचा जोर एवढा होता की शेतकऱ्यांच्या कांदा चाळीतील कांद्यात वादळी हवेमुळे पावसाचे पाणी शिरले. यात अधून मधून गाराही पडल्या. जोरदार पाऊस व हवेमुळे, लोहगाव, मुलांनी वाडगाव, ढाकेफळ, शेवता, मावसगव्हाण, लामगव्हाण, ब्रम्हगव्हाण शिवारातील गावठाण, शेती फिडरचे वीज पोल, पडले, तारा तुटल्या अनेक वृक्ष कोसळले असून केळी बाग आडवी झाली. कांदा चाळीत हवेमुळे पाणी गेल्याने मोठे नुकसान झाले.

मृग नक्षत्र आगमनाच्या पहिल्या दिवशी सर्व शेतात पाणीच पाणी साचले होते. तर गावातील गटारात कचरा कपडे, प्लास्टिक अडकल्याने पाणी तुंबलेले चित्र बघायला मिळाले, ब्रम्हगव्हाण येथेही गटार जाम झाल्यामुळे एका भागात पाणी साचल्याने काही घरांना पाण्याचा सामना करावा लागल्याचे माहिती आहे. नुकसान झालेले शेतकऱ्यांना शासनाने नैसर्गिक आपत्तीतून नुकसान भरपाई द्यावी अशी मागणी फळपीक, कांदा उत्पादक शेतकऱ्यांनी केली आहे. आता हळूहळू नुकसानीची माहिती समोर येते आहे.

माहितीनुसार, ढाकेफळ येथील महिला शेतकरी अनुराधा घुगे यांच्या २ एकर केळी, ५ एकर केसर आंबा, आणि २ टन भिजवलेली हळद होती, जी सुकवून विक्रीसाठी ठेवलेली होती तिचे नुकसान झाले. वादळामुळे बदामाची झाडंही पडली. शेतावर असलेले शेतीसामान आणि घराचेही मोठे नुकसान झाले.

नव्याने हळद लागवड करण्याचे नियोजन होते, त्यासाठी खते बाहेर ठेवली होती,तीही पूर्णपणे भिजली. गणेश अशोक इथापे या शेतकऱ्यांचे कांदा चाळीवरील पत्रे उडाल्याने ७० ते ८० क्विंटल कांदा नुकसान व एक गाय जखमी झाली. जायकवाडी परिसरातही पाऊस झाला. जालना जिल्ह्यातील सुखापूरी परिसरातही पाऊस झाला. बीड जिल्ह्यातील अंबाजोगाईत आठ दिवसाच्या खंडानंतर जोराचा पाऊस झाला.