अॅग्रोवन वृत्तसेवा

Akola News : अकोला : पारंपरिक पिकांना पर्याय तसेच नगदी पीक म्हणून ओळख असलेल्या मसालावर्गीय काळेजिरे, सोप, ओवा आदी पिकांना यंदाच्या रब्बी हंगामात लागवडीसाठी शेतकऱ्यांना प्रोत्साहन दिले जात आहे. जिल्ह्यात या हंगामात सुमारे ७२० एकरांवर या विविध पिकांची लागवड होत आहे.

आत्मा यंत्रणा, कृषी विभागाच्या पुढाकाराने शेतकऱ्यांना मसाला पिकांच्या निविष्ठा देण्यात आल्या. यावेळी जिल्हाधिकारी अजित कुंभार यांनी म्हैसपूर या गावात शेतकऱ्यांना या निविष्ठांचे वितरणही केले. जिल्ह्यात मसालावर्गीय पिकांचे क्षेत्र वाढविण्यासाठी कृषी वसंत अभियानाच्या माध्यमातून प्रयत्न होत आहे.

या अनुषंगाने जिल्ह्यात ७२० एकरांवर मसालावर्गीय पिकांची प्रात्यक्षिके राबविण्यात येत आहेत. जिल्ह्यात मसाला पिकांचे क्षेत्र वाढावे व शेतकऱ्यांना कमी खर्चात अधिक उत्पादन मिळावे यासाठी तत्कालीन पालकमंत्री राधाकृष्ण विखे पाटील व जिल्हाधिकारी अजित कुंभार यांच्या मार्गदर्शनात डॉ. पंजाबराव देशमुख कृषी विद्यापीठाच्या मिरची व भाजीपाला संशोधन केंद्राच्या सहकार्याने हा प्रकल्प राबविण्यात येत आहे.

अकोला जिल्ह्यात २१७ एकरांवर काळजिरे, १०० एकरांवर बडीशेप, २१७ एकरांवर ओवा, ५० एकरांवर कसुरी मेथी, १०० एकरांत धने अशा एकूण ७२० एकरांवर प्रात्यक्षिके राबविण्यात येत आहेत. याअनुषंगाने जिल्हाधिकाऱ्यांनी म्हैसपूर येथे भेट देऊन शेतकऱ्यां-यांशी संवाद साधला.

यावेळी जिल्हा अधिक्षक कृषी अधिकारी शंकर किरवे, ‘आत्मा’चे प्रकल्प संचालक डॉ. मुरली इंगळे, डॉ. पंजाबराव देशमुख कृषी विद्यापीठातील मिरची व भाजीपाला संशोधन केंद्राचे बियाणे पैदासकार डॉ. श्याम घावडे,आत्माचे तालुका तंत्रज्ञान व्यवस्थापक व्ही. एम. शेगोकार, कृषी सहाय्यक मेघा नागे, शालिनी निखाडे आदी उपस्थित होते.

पिके व लागवड क्षेत्र

काळे जिरे :२१७ एकर

सोप : १०० एकर

ओवा : २१७ एकर

कसुरी मेथी : ५० एकर

धने : १०० एकर