Akola News : मसालावर्गीय पिकांच्या लागवडीमुळे शेतकऱ्यांची आर्थिक स्थिती सुधारू शकते, असा आशावाद डॉ. पंजाबराव देशमुख कृषी विद्यापीठाच्या मिरची व भाजीपाला संशोधन केंद्राचे प्रमुख शास्त्रज्ञ डॉ. एस. एम. घावडे यांनी व्यक्त केला.

जिल्हाधिकारी अजित कुंभार यांच्या संकल्पनेतून कृषी वसंत अभियान राबविण्यात येत असून मसाला पिकांच्या शेतीसाठी शेतकऱ्यांना प्रोत्साहन मिळावे यासाठी डॉ. पंजाबराव देशमुख कृषी विद्यापीठामार्फत ओवा, बडीसोप, धने, काळेजिरे, कसुरी मेथी आदी मसालेवर्गीय पिकांचे प्रात्यक्षिक या हंगामात राबविण्यात आले. त्याअंतर्गत बाळापूर तालुक्यातील काजीखेड येथे मसालेवर्गीय पिकांचे प्रशिक्षण घेण्यात आले. याठिकाणी डॉ. घावडे यांनी मार्गदर्शन केले.

कार्यक्रमाला सरपंच रेखाताई धुमाळे, आत्मा समिती सदस्य रामदास भानगे, बियाणे उपसंचालक डॉ. डी. टी. देशमुख, तालुका तंत्र व्यवस्थापक व्ही. एम. शेगोकार, कृषी सहाय्यक उद्धव धुमाळे, नवनाथ धुमाळे, महादेव धुमाळे यांची प्रामुख्याने उपस्थिती होती.

डॉ. घावडे यांनी ओवा, बडीसोप, धने, काळेजिरे, कसुरी मेथी यांसारख्या नवीन पिकांच्या लागवडीबद्दल शेतकऱ्यांमध्ये जनजागृती करणे आवश्यक असल्याचे सांगितले. ही पिके शेतकऱ्यांची आर्थिक स्थिती सुधारू शकते. पिकांना वन्यप्राण्यांचा त्रास कुठलाच नसून कमी पाण्यामध्ये घेता येतात. साधारणपणे दोन ते तीन पाण्याच्या पाळ्या द्याव्या लागतात.

रासायनिक खतांची फारशी गरज लागत नाही. जर खते द्यायचीच असतील तर सेंद्रिय खतांचा वापर करावा. त्याचप्रमाणे मसालेवर्गीय पिकांची बाजारपेठ उपलब्ध आहे, असेही शेतकऱ्यांना सांगितले. मार्गदर्शनानंतर ओवा पिकाच्या प्रक्षेत्राची पाहणी करण्यात आली.

या प्रशिक्षणासाठी मोठ्या संख्येने शेतकऱ्यांची उपस्थिती होती. कार्यक्रमासाठी कृषी सहाय्यक उद्धव धुमाळे, जीवन परघरमोर, महादेव धुमाळे, उमेश धुमाळे, अवधूत धुमाळे, देवराव परघरमोर आदींनी पुढाकार घेतला.