Parbhani News : परभणी हिंगोली जिल्ह्यात मूग, उडीद, तूर या कडधान्यांच्या क्षेत्रातील घट यंदाही कायम आहे. यावर्षी खरिपात शुक्रवार (ता. १८) पर्यंत परभणी जिल्ह्यात ३९ हजार ३६४ हेक्टर (५९.०३ टक्के) आणि हिंगोली जिल्ह्यात ३९ हजार १६५ हेक्टर (६६.३९ टक्के) मिळून एकूण कडधान्यांची ७८ हजार ५२९ हेक्टरवर पेरणी झाली.

एकूण खरीप पिकांची परभणी जिल्ह्यात ४ लाख ७७ हजार ५०७ हेक्टर (९२.१० टक्के) तर हिंगोली जिल्ह्यात ३ लाख ४७ हजार ८०९ हेक्टरवर (८४.७७ टक्के) मिळून एकूण ८ लाख २५ हजार ३१६ हेक्टरवर पेरणी झाली आहे, माहिती कृषी विभागातर्फे देण्यात आली.

कृषी विभागाकडील आकडेवारीनुसार, परभणी जिल्ह्यात सरासरी ५ लाख १८ हजार ४६७ पैकी ४लाख ७७ हजार ५०७ हेक्टरवर पेरणी झाली. त्यात एकूण कडधान्याची ६६ हजार ६८१ पैकी ३९ हजार ३६४ हेक्टर पेरणी झाली त्यात तुरीची ४२ हजार ६०२ पैकी ३२ हजार ८०९ हेक्टर (७७.०४ टक्के), मुगाची १७ हजार ६०० पैकी ४ हजार ६९१ हेक्टर (२६.६६ टक्के), उडदाची ६ हजार ४१३ पैकी १ हजार ८०९ हेक्टरवर (२८.२१ टक्के) पेरणी झाली.

सोयाबीनची २ लाख ५४ हजार ५४ पैकी २ लाख ५० हजार ५०हेक्टर (९८.४२ टक्के) पेरणी झाली. तृणधान्यांची ५ हजार ४४९ पैकी १ हजार २८४ हेक्टर पेरणी झाली. त्यात ज्वारीची ३ हजार ८५७ पैकी ७१४ हेक्टर, बाजरीची ४९९ पैकी ८९ हेक्टर, मक्याची ९८३ पैकी ४७६ हेक्टर पेरणी झाली आहे. कपाशीची १ लाख ९१ हजार ९५४ पैकी १ लाख ८६ हजार ६६३ हेक्टर (९७.२४टक्के) लागवड झाली आहे.

हिंगोली जिल्ह्यात सरासरी ४ लाख १० हजार ३९८ पैकी ३ लाख ४७ हजार ८०९हेक्टरवर (८४.७४टक्के) पेरणी झाली. त्यात एकूण कडधान्यांची ५८ हजार ९९३ पैकी ३९ हजार १६५ हेक्टर पेरणी झाली. त्यात तुरीची ३१ हजार ५४८ हेक्टर (६९.६३ टक्के), मुगाची ४ हजार २५२ हेक्टर (५४.६५ टक्के), उडदाची ३ हजार १५२ हेक्टर (५३.६१ टक्के) पेरणी झाली.

सोयाबीनची २ लाख ५६ हजार ४०४ पैकी २ लाख ६९ हजार ११३ हेक्टरवर (१०४.९५ टक्के) पेरणी झाली. तृणधान्यांची २ हजार ८३५ हेक्टर पेरणी झाली. त्यात ज्वारीची २ हजार ५६१ हेक्टर, बाजरीची १३ हेक्टर, मक्याची २३६हेक्टर पेरणी झाली.

कपाशीची ३८ हजार ८२१ पैकी ३६हजार ६३० हेक्टरवर (९४.३६ टक्के) लागवड झाली. या दोन जिल्ह्यांत मूग, उडदाच्या क्षेत्रात मोठी घट झाली असून तुरीची पेरणीही कमी झाली आहे.