Parbhani News : यावर्षीच्या (२०२४) रब्बी हंगामात परभणी आणि हिंगोली जिल्ह्यात करडईची १ हजार ८७९ हेक्टरवर पेरणी झाली आहे. परभणी जिल्ह्यात करडईच्या क्षेत्रातील घट कायम आहे. मात्र, हिंगोली जिल्ह्यातील करडईची सरासरीपेक्षा जास्त पेरणी झाली आहे.

परभणी जिल्ह्यात करडईचे सरासरी क्षेत्र ३ हजार ३७१ हेक्टर असून आजवर ९२७ हेक्टरवर (२७.४९ टक्के) पेरणी झाली आहे. जिंतूर, पूर्णा तालुक्यात करईडचा पेरा निरंक आहे. परभणी, सेलू, मानवत, पाथरी, सोनपेठ, गंगाखेड तालुक्यात सरासरीपेक्षा कमी पेरणी झाली.

पालम तालुक्यात पेरा वाढला आहे. जवसाची १९९ पैकी ३२ हेक्टर (२६.८९ टक्के) पेरणी झाली. एकूण रब्बी गळीत धान्यांची ३ हजार ६४४ हेक्टर पैकी १ हजार २५ हेक्टरवर पेरणी झाली आहे.

जिल्ह्यात एकूण रब्बी कडधान्यांचे सरासरी क्षेत्र १ लाख १२ हजार २७२ हेक्टर असतांना यंदा १ लाख २७ हजार २१९ हेक्टरवर (११३.३१ टक्के) पेरणी झाली आहे.

एकूण रब्बी तृणधान्यांची १ लाख ५४ हजार ८७६ हेक्टर पैकी १ लाख ३ हजार ९९७ हेक्टरवर (६७.१५ टक्के) पेरणी झाली. हिंगोली जिल्ह्यात करडईचे सरासरी क्षेत्र २०५ हेक्टर असून यंदा प्रत्यक्षात ९५२ हेक्टरवर (४६२.९२ टक्के) पेरणी झाली आहे.

परभणी-हिंगोली जिल्हे करडई पेरणी स्थिती (हेक्टरमध्ये) स्रोत कृषी विभाग