Solapur News : सांगोला तालुक्यात रब्बी हंगामात ३९ हजार ३४१ हेक्टर क्षेत्रावर ८८.४६ टक्के पेरण्या झाल्या आहेत. तालुक्यात २१ हजार ४८५ हेक्टरवर ५७.३३ टक्के क्षेत्रावर रब्बी ज्वारीची सर्वाधिक पेरणी झाली आहे.

रब्बी पिकाच्या पेरणीत ज्वारीच्या पेरण्या ५० टक्क्यांवर झाल्या आहेत. गहू व हरभरा पिकांच्या पेरणी क्षेत्रात आणखी वाढ होणार असल्याची माहिती तालुका कृषी अधिकारी दीपाली जाधव यांनी दिली.

सांगोला तालुक्यात या वर्षी समाधानकारक पाऊस झाल्याने खरीप व रब्बी हंगामातील पेरण्यांमध्ये वाढ झाली आहे. विहीरी व विंधन विहिरींना सध्या समाधानकारक पाणी आहे. उपलब्ध पाण्यामुळे शेतकऱ्यांनी यावर्षी मोठ्या प्रमाणात पेरणी केली आहे.

सांगोला तालुक्यात २१ हजार ४८५ हेक्टर (५७.३३ टक्के) क्षेत्रावर रब्बी ज्वारी, २ हजार ३५१ हेक्टर (२८६ टक्के) क्षेत्रावर गहू, १३ हजार ३२१ हेक्टर (२५८ टक्के) क्षेत्रावर मका, २ हजार ०२६ हेक्टर क्षेत्रावर (२६३ टक्के) हरभरा, इतर कडधान्य ३९ हेक्टर, जवस २४ हेक्टर, भुईमूग ६३ हेक्टर, करडई ३२ हेक्टर अशा ३९ हजार ३४१ हेक्टर क्षेत्रावर पेरण्या झाल्या आहेत. तसेच मका १ हजार ८२४ हेक्टर, ज्वारी १ हजार २८० हेक्टर अशी ३ हजार १०४ हेक्टर क्षेत्रावर चारा पिके घेतली आहेत.

कांदा ४४ हेक्टर, ३८ हेक्टर टोमॅटो, मिरची ११७ हेक्टर, वांगी ७७ हेक्टर, भेंडी ४ हेक्टर, दोडका ९ हेक्टर, घेवडा १ हेक्टर, कारले १० हेक्टर, शेवगा ४६ हेक्टर अशी ३४६ हेक्टर क्षेत्रावर भाजीपाला पिके घेतली आहेत.

यंदाच्या हंगामात आंबा ६४ हेक्टर, डाळिंब १३३ हेक्टर, अंजीर ५ हेक्टर, लिंबू १ हेक्टर, पेरू ५५ हेक्टर, सीताफळ १३ हेक्टर, बोर २३ हेक्टर, केळी १७८ हेक्टर, पपई १ हेक्टर, कलिंगड १८ हेक्टर, खरबूज ३१ हेक्टर, ड्रॅगन फ्रूट ३ हेक्टर अशी ५२५ हेक्टर क्षेत्रावर नव्याने फळबाग लागवड करण्यात आली आहे.

तालुक्यात ६४६ हेक्टर क्षेत्रावर आडसाली ऊस, ५४६ हेक्टर क्षेत्रावर पूर्व हंगामी ऊस, १९ हेक्टर क्षेत्रावर खोडवा ऊस अशी १२०४ हेक्टर क्षेत्रावर उसाची लागवड करण्यात आली आहे. परतीच्या पावसाने दिलासा दिल्याने यंदा रब्बी हंगामातील पिके हाती लागतील अशी आशा शेतकऱ्यांना लागली आहे.

तालुक्यात रब्बी हंगामात ३९ हजार ३४१ हेक्टर क्षेत्रावर ८८.४६ टक्के पेरण्या झाल्या आहेत. सध्या ज्वारीची सर्वाधिक पेरणी झाली आहे. आत्तापर्यंत २ हजार ३५१ हेक्टर क्षेत्रावर गहू पिकाची पेरणी झाली असली तरी गहू व हरभरा पिकाची अजूनही पेरणी सुरू असून, या पिकांची पेरणी क्षेत्रात वाढ होणार आहे. पाऊस चांगला झाल्याने पाण्याची कमतरता कमी पडणार नाही अशी तालुक्यात परिस्थिती आहे.- दीपाली जाधव, तालुका कृषी आधिक्य, सांगोला.