सिंधुदुर्गनगरी ः पंतप्रधान घरकुल योजनेअंतर्गत जिल्ह्यात आतापर्यंत ४ हजार ९७९ घरकुले बांधून पूर्ण झाली आहेत. सिंधुदुर्ग राज्यात अव्वल ठरला असून जिल्ह्यात या योजनेचे ९९.२८ टक्के काम झाले आहे.

पंतप्रधान घरकुल योजना सुरू झाल्यापासून सिंधुदुर्ग जिल्ह्याकरिता ५ हजार १५ घरांना मंजुरी मिळाली होती. त्यात आता नव्याने २०२४-२५ करिता ६०५ घरकुलांना मान्यता मिळाली आहे. दरम्यान ५ हजार १५ पैकी ४ हजार ९७९ घरकुले बांधून पूर्ण झाली आहेत.

उर्वरित ३६ घरकुलांचे काम देखील अंतिम टप्प्यात आहे. या योजनेचे जिल्ह्यात ९९.२८ टक्के काम पूर्ण झाले असून या योजनेत सिंधुदुर्ग राज्यात अव्वल ठरला आहे.

दरम्यान, आता टप्पा दोनअंतर्गत सिंधुदुर्ग जिल्ह्याकरिता नव्याने ६०५ घरकुलांना मंजुरी मिळाली आहे. या योजनेअंतर्गत लाभार्थ्यांना एकूण १ लाख २० हजार अनुदान चार टप्प्यात दिले जाते.

पहिला १५ हजार, दुसरा हप्ता ७० हजार, तिसरा टप्पा ३० हजार, अंतिम टप्पा पाच हजार रुपये असा दिला जातो.