New Delhi News : पंतप्रधानपदाची शपथ घेतल्यानंतर नरेंद्र मोदी लगेच कामाला लागले असून पंतप्रधान शेतकरी सन्मान योजनेच्या (पीएम किसान) हप्ता जारी करण्यासंदर्भातील फाईलवर सोमवारी (ता. १०) सकाळी त्यांनी सही केली.

सलग तिसऱ्यांदा पंतप्रधान बनल्यानंतर त्यांनी सही केलेली ही पहिली फाइल ठरली. योजनेचा १७ वा हप्ता चालू महिन्यातच शेतकऱ्यांना मिळण्याचा अंदाज वर्तविला जात आहे.

पीएम किसान योजनेअंतर्गत शेतकऱ्यांना दर चार महिन्याला दोन हजार रुपयांचा निधी दिला जातो. हा निधी थेट शेतकऱ्यांच्या बॅंक खात्यात ‘डीबीटी’च्या माध्यमातून वर्ग होत असतो.

९.३ कोटी शेतकऱ्यांच्या बॅंक खात्यात सुमारे २० हजार कोटी रुपये वर्ग होणार आहेत. याआधी पीएम किसान सन्मान योजनेचा १६ वा हप्ता २८ फेब्रुवारी रोजी जारी करण्यात आला होता.

‘‘शेतकऱ्यांच्या कल्याणसाठी आमचे सरकार पूर्णपणे वचनबद्ध आहे. त्यामुळे पदभार स्वीकारल्यानंतर स्वाक्षरी केलेली पहिली फाईल शेतकरी कल्याणाशी संबंधित आहे. आम्हाला येणाऱ्या काळात शेतकरी आणि कृषी क्षेत्रासाठी आणखी काम करायचे आहे,’’ असे पंतप्रधान मोदी फाइलवर स्वाक्षरी केल्यानंतर म्हणाले.