Nashik News : नांदगाव तालुक्यातील गिरणा काठच्या गावांमध्ये दरवर्षी ठिबक सिंचनावर आगाप कापूस लागवडी मेअखेर सुरू होत असतात. यंदा त्या सुरू झाल्या आहेत. मात्र लागवडीचे क्षेत्र यंदा कमी होण्याचा अंदाज आहे. कापूस पिकाला पर्याय देत शेतकऱ्यांचा मका पिकाकडे कल आहे, असे स्थानिक शेतकऱ्यांनी सांगितले.

गेल्या वर्षी पाणीटंचाईमुळे शेतकऱ्यांना अडचणी आल्या होत्या. अशा परिस्थितीत ठिबक सिंचनावर या भागात कापूस लागवडी करण्यात आल्या होत्या. यंदा मॉन्सूनपूर्व पाऊस बरसला आहे. त्यात पाणीसाठा समाधानकारक असल्याने शेतकऱ्यांनी लागवडी सुरू केल्या आहेत. मात्र दरवर्षीच्या तुलनेत हे क्षेत्र सरासरीपेक्षा कमी असेल असा अंदाज वर्तवला जात आहे.

चालू वर्षी मे मध्ये १६ तारखेपासून कापूस बियाणे विक्री सुरू झाली होती. त्यानुसार बियाणे उपलब्ध करून लागवडी सुरू झाल्या आहेत. नांदगाव तालुक्यातील बोराळे, आमोदे, गिरणा धरण परिसर, मळगाव, आसपासच्या गावांमध्ये लागवडी होत आहेत. मका पिकाला मागणी वाढत असून उपलब्ध होणारा चारा तसेच नुकसान कमी असल्याने ही स्थिती आहे.

यासह मजूर टंचाईचा मुद्दा असल्याने कापूस पिकाकडे शेतकऱ्यांचा यंदा कल कमी असेल असे चित्र आहे. त्यातच मॉन्सूनोत्तर पावसामुळे कापूस पिकाचे नुकसान होत असल्याने शेतकऱ्यांनी पर्यायी पिकाला पसंती दिली आहे.

मका पिकाकडे कल

जिल्ह्यातील पूर्व भागातील शेतकऱ्यांचा कल कापूस लागवडीच्या तुलनेत मका पिकाकडे दिसून येत आहे. मागील वर्षी किमान आधारभूत किमतीच्या खाली दर मिळाल्याने शेतकऱ्यांमध्ये लागवडीसाठी उत्साह नाही. त्यामुळे यंदा लागवड कमी होण्याचा अंदाज आहे.