Nanded News : गावात सांडपाण्यापासून होणारी दुर्गंधी तसेच गावातील ओला आणि सुका तसेच प्लास्टिक कचऱ्याचे व्यवस्थापन करण्याचे काम स्वच्छ भारत मिशन टप्पा दोन अंतर्गत सुरू झाले आहे. आज घडीला जिल्हा परिषदेच्या पुढाकारातून आणि ग्रामपंचायतीच्या माध्यमातून २७ कोटी ८५ लाख रुपये खर्च झाले असून जिल्ह्यातील ४८५ गावांमध्ये सांडपाणी व घनकचरा व्यवस्थापनाचे काम पुर्ण झाले आहे. कामे पूर्ण झालेल्या गावात त्यामुळे आता पाण्याची पातळी वाढण्यास मदत होणार आहे.

ग्रामीण भागात गावामध्ये वाहणाऱ्या नाल्यामधील दूषित पाणी व गावातील केरकचरा यामुळे दुर्गंधी पसरून विविध आजाराला आमंत्रण मिळत होते. यावर उपाय म्हणून गावांमध्ये सांडपाण्यापासून होणारी दुर्गंधी तसेच ओला - सुका आणि प्लास्टिक कचऱ्याचे व्यवस्थापन करण्याच्या सूचना होत्या.

त्यानुसार मुख्य कार्यकारी अधिकारी मीनल करनवाल यांनी संबंधित विभागाचे अधिकारी आणि विभागप्रमुख यांची बैठक घेऊन तालुकानिहाय आढावा घेतला. तालुकानिहाय कामाची जबाबदारी दिली. त्यानुसार गावागावात कामाचे नियोजन करण्यात आले आहे. गावागावात स्वच्छता व साफसफाई करणे, शोषखड्डे करणे, कचऱ्याची विल्हेवाट लावण्यासाठी कचरा संकलनासाठी जाळ्या व कचरा पेटी उभारणे यासह अन्य कामे करण्यात आली आहेत.

यासाठी गावकऱ्यांचीही मदत घेण्यात आली आहे. नांदेड जिल्ह्यात एक हजार ३०९ ग्रामपंचायती असून त्या अंतर्गत एक हजार ५३४ गावे आहेत. त्यातील ४८५ गावांमध्ये स्वच्छ भारत मिशन अंतर्गत अभियान राबवत सांडपाणी व घनकचऱ्याचे नियोजन करण्यात आले आहे.

गावाप्रमाणे शोषखड्ड्यांची निर्मिती

स्वच्छ भारत मिशन अंतर्गत कामे करताना गावातील कुटुंबाच्या संख्येप्रमाणे नियोजन करण्यात आले आहे. यासाठी प्रति कुटुंब ३४० रुपये असा निधी खर्च करण्यात आला आहे. या उपक्रमात नालीचे दुषित पाणी शोषखड्डे करून जमिनीत मुरविण्यात येत आहे. मोठे गाव असेल तर त्या ठिकाणी १२ ते १५ शोष खड्डे आणि छोटे गाव असेल तर पाच ते सात शोष खड्डे घेण्यात आले आहेत.