Jalna News : तालुक्यात एप्रिलच्या शेवटच्या टप्प्यात पाणीटंचाईचे चटके सहन करावे लागत आहेत. वाढत्या तापमानासोबत दहा ते बारा गावे पाणीटंचाईच्या छायेत आहेत. आगामी काही महिन्यांत अनेक गावांत पाणीटंचाई जाणवण्याची शक्यता आहे.

घनसावंगी तालुक्यात गेल्यावर्षी चांगला पाऊस झाला. त्यामुळे सिंचन प्रकल्पासह नदी, नाल्यांना चांगले पाणी आले होते. परंतु, आता प्रत्येक शेतकऱ्याकडे सोलार पॅनल बसविण्यात आल्याने दिवसा सोलार पॅनल, तर रात्रीच्यावेळी विजेवर पाण्याचा उपसा करून शेतकऱ्यांनी यंदा सर्वच पिके पाण्याखाली करण्याचा प्रयत्न केला.

त्यामुळे एकीकडे शेती बागायती झाली असली, तरी दिवसेंदिवस पाण्याचा वाढता उपसा पाहता पाणीपातळी खालावली. त्यामुळे अनेक भागांतील विहिरींचा पाण्याचा उपसा एक तासावर आला. आता एप्रिल महिन्याच्या शेवटच्या आठवड्यात सुरू करण्याची वेळ आली आहे.

तालुक्यात बोरगाव खुर्द व तांडे, रवना, विरेगव्हाण तांडा येथे टँकरची तर पाडुळी खुर्द व तांडा, भादली येथे विहीर अधिग्रहण सुरू करण्याची मागणी करण्यात आली आहे. दरम्यान, येत्या आठवड्यात डहाळेगाव, मोहपुरी, पिंपरखेड बुद्रुक, घोन्सी बुद्रुक, घोन्सी खुर्द व तांडे, भेंडाळा येथे टँकर सुरू करण्याची वेळ येणार आहे. ग्रामीण भागात हातपंपांची दुरवस्था झाली आहे.