Nashik News : वन्यप्राण्यांचा वावर असलेल्या जिल्ह्यातील सर्वांत मोठ्या वनहद्दीत दरवर्षी उन्हाळ्यात अन्न-पाण्यासाठी प्राण्यांना भटकंती करावी लागते. सध्या हरणांसह वन्यप्राण्यांची तहान भागवण्यासाठी सुमारे २० ठिकाणी कृत्रिम पाणवठ्यात तसेच सोलर बोअरवेलच्या माध्यमातून पाण्याची उपलब्धता केली जात आहे.

तालुक्यातील ९ हजार ६०० हेक्टर क्षेत्र वन विभागाच्या प्रादेशिक कार्यालयाच्या अखत्यारित येते. यात राजापूर, ममदापूर परिसरात वन विभागाने ५ हजार ४९५ हेक्टरवर राखीव वन संवर्धन क्षेत्र राखीव प्रकल्प साकारला आहे.

तालुक्यात हरिण, काळवीट यांची सहा ते सात हजार संख्या असून काळवीट, तरस, लांडगा, ससे, कोल्हे, खोकड, रानडुक्कर, उदमांजर, रान मांजर, सायाळ, मोर व इतर पशू-पक्षी आहेत. हा भाग दुष्काळी व अवर्षणप्रवण असल्याने उन्हाळ्यात पाणी व अन्नाच्या टंचाईने हरणांचे हाल होतात.

वाढत्या उन्हामुळे डोंगर तप्त होत असल्याने राजापूर-ममदापूरच्या वनहद्दीतील हजारोंच्या संख्येने असलेल्या हरणांचा जीव कासावीस होत आहे.या वर्षी पावसाने अवकृपा केल्याने जंगलात वन्यजीवांसाठी पाणीबाणीची परिस्थिती निर्माण झाली आहे. जंगलातील बहुतांश पाणीसाठे आटले असून छोठे-मोठे बंधारेही कोरडे पडले आहेत.

त्यामुळे वन्यजीवांसाठी टँकरने पाणीपुरवठा केला जात आहे. वन विभागाच्या वतीने वनक्षेत्रात विविध ठिकाणी एकूण २० कृत्रिम पाणवठे तयार केलेले असून हे पाणवठे हरीण, काळवीट आदी वन्यजीवांची तहान भागवत आहेत. वन विभागाच्या वतीने यातील काही कृत्रिम पाणवठ्यात टॅंकरद्वारे पाणी सोडले जात आहे.