Parbhani News : वसंतराव नाईक मराठवाडा कृषी विद्यापीठाच्या विस्तार कार्याअंतर्गत माझा एक दिवस माझ्या बळिराजासाठी हा उपक्रम बुधवारी (ता. ११) संपूर्ण मराठवाड्यामध्ये राबविण्यात आला. याअंतर्गंत कृषी विद्यापीठातील तज्ज्ञ आठ जिल्ह्यांतील सुमारे ५०० शेतकऱ्यांच्या बांधावर पोहचले. तूर, हळद, कपाशी, हरभरा आदी पिकांवरील पीक, कीड, रोग व्यवस्थापनावर माहिती देत शेतकऱ्यांशी संवाद साधला. पीकविषयक समस्यांचे निराकरण केले.

कुलगुरू डॉ. इंद्र मणी मिश्रा यांच्या संकल्पनेतून, विस्तार शिक्षण संचालक डॉ. गिरधारी वाघमारे यांच्या मार्गदर्शना मराठवाड्यातील आठही जिल्ह्यात प्रत्येक महिन्याच्या दुसऱ्या बुधवारी ‘माझा एक दिवस माझ्या बळीराजा सोबत’ हा उपक्रम राबविण्यात येत आहे. याअंतर्गंत बुधवारी (ता. ११) मराठवाड्यातील आठ जिल्ह्यातील शेतकऱ्यांच्या बांधावर जाऊन विद्यापीठाच्या ३३ शास्त्रज्ञांनी शेतीविषयक समस्या जाणून घेतल्या.

विविध विषयावर शेतकऱ्यांना माहिती दिली. मुख्य विस्तार शिक्षण अधिकारी डॉ. प्रशांत देशमुख, विस्तार कृषी विद्यावेत्ता डॉ. गजानन गडदे, सहाय्यक कीटकशास्त्रज्ञ डॉ. दिगंबर पटाईत, मधुकर मांडगे लोहगाव (ता. परभणी) येथील सिताराम देशमुख यांच्या गांडूळ खत निर्मिती प्रकल्पास व अंजीर बाग, दिनकर देशमुख यांच्या हळद लागवडीची पाहणी केली. यावेळी कुलगुरू डॉ. इंद्र मणी ऑनलाइन पद्धतीने सहभागी झाले होते.

ते म्हणाले, की विद्यापीठ शेतकऱ्यांना कृषी तंत्रज्ञानाविषयी माहिती तर देतेच परंतु त्यांच्या संपूर्ण कुटुंबाच्या प्रगतीसाठी सुद्धा सदैव तत्पर असते. शास्त्रज्ञांनी भेट दिली.

लातूर येथील कृषी महाविद्यालय व विलासराव देशमुख कृषी जैवतंत्रज्ञान महाविद्यालयाचे सहयोगी अधिष्ठाता डॉ.बाबासाहेब ठोंबरे, डॉ. विजय भामरे, डॉ.अच्युत भरोसे, डॉ. ज्ञानेश्वर सुरडकर यांनी बोरवटी, महापूर येथील शेतकऱ्यांच्या शेतावर पोहचले. विभागीय कृषी विस्तार शिक्षण केंद्राचे कृषिविस्तार विद्यावेत्ता डॉ. वसंत सूर्यवंशी (अंबाजोगाई) यांनी पट्टीवडगाव येथील शेतकऱ्यांना सेंद्रिय शेती रबी पीक व्यवस्थापनावर माहिती दिली.

विस्तार कृषिविद्यावेत्ता प्रा. अरुण गुट्टे यांनी उदगीर तालुक्यातील मोघा, लोहारा, कवूळखेड, हिप्परगा, शेल्हाळ गावात प्रक्षेत्र भेटीच्या अंतर्गत शेतकऱ्यांच्या बांधावर जाऊन पीक परिस्थितीची पाहणी केली.

मोघा येथील तुरीच्या गोदावरी वाणाच्या पिकांची पाहणी केली. छत्रपती संभाजीनगर जिल्ह्यातील हातमाळी येथे कापूस प्रक्षेत्र दिवसाचे आयोजन करण्यात आले होते. उपसंचालक डॉ. सूर्यकांत पवार, तालुका कृषी अधिकारी श्याम गुळवे, कार्यक्रम समन्वयक इंजि. गीता यादव, विषय विशेषज्ञ डॉ. बस्वराज पिसुरे, डॉ. संजूला भावर, हिरालाल भगुरे उपस्थित होते.