Dombivali News : पावसाळ्यात खाडी परिसरात मोठ्या प्रमाणात वाळू मिळत असल्याने या दिवसांत वाळूमाफिया सक्रिय असतात. बेकायदा होणाऱ्या रेती उपशावर कारवाईसाठी महसूल विभागाकडून गस्त घातली जात आहे; मात्र त्यांच्या नाकावर टिच्चून रेती माफिया बिनधास्त खाडीत बेकायदा रेती उपसा करीत आहेत.

शुक्रवारी महसूल विभागाने डोंबिवली मोठागाव परिसरात कारवाई केली; मात्र आता पुन्हा खाडीपात्रात रेती माफियांच्या बोटी पुन्हा रेतीउपसा करताना आढळून आल्या. यावरून महसूल विभागाच्या कारवाईचा कोणताही धाक रेतीमाफियांना नसल्याचे यावरून दिसून येत आहे.

ठाणे जिल्ह्यातील ठाणे, मुंब्रा, कळवा, दिवा, भिवंडी ग्रामीण भाग, डोंबिवलीतील कोपर, मोठागाव, रेतीबंदर खाडी परिसर, कल्याण रेतीबंदर दुर्गाडी खाडी परिसरात बेकायदा रेती उपसा करण्याचे प्रमाण मोठे आहे. बेकायदा रेतीउपसा करणाऱ्या रेती माफियांवर ठाणे जिल्हा प्रशासन महसूल विभागाकडून वारंवार कारवाई करण्यात येत असते; मात्र अद्यापपर्यंत बेकायदा रेती उपशाला आळा घालणे महसूल विभागाला जमलेले नाही.

पावसाळ्यात खाडीपात्रात वाळू वाहून येते. यामुळे दिवसांत रेती उपसादेखील मोठ्या प्रमाणात सुरू असतो. हे रेतीमाफिया खाडी परिसरात खड्डे करून तेथे रेती जमा होईल, अशी व्यवस्था करतात. नंतर त्या ठिकाणी सक्शन पंप किंवा इतर पद्धतीने रेतीउपसा केला जातो. दिवसभरात रेतीउपसा करून रात्री ट्रकमधून याची बेकायदा वाहतूकदेखील केली जाते.

खारफुटीचा आसरा

महसूल विभागाच्या कारवाईचा सुगावा लागताच रेतीमाफिया बोटी घेऊन खाडीकिनारी दाट खारफुटीचा आसरा घेत लपतात. अधिकारी जाताच पुन्हा ते बोटी घेऊन खाडीपात्रात उतरतात. हे चित्र उघड उघड दिसत असताना महसूल विभागाकडून ठोस अशी कारवाई का केली जात नाही, हे प्रश्न अनुत्तरीत आहेत.