Washim News : वाशिम जिल्ह्यातील साखरा येथील भारतरत्न अटल बिहारी वाजपेयी आंतरराष्ट्रीय जिल्हा परिषद उच्च प्राथमिक शाळेने ‘मुख्यमंत्री माझी शाळा, सुंदर शाळा'' या योजनेअंतर्गत आयोजित स्पर्धेमध्ये राज्यातून प्रथम पारितोषिक पटकावत जिल्ह्याचा नावलौकिक वाढवला आहे. शाळेला ५१ लाखांचे पारितोषिक जाहीर झाले आहे.

ग्रामीण भागातील एका शाळेने केलेल्या कामगिरीबद्दल जिल्हा परिषद अध्यक्ष चंद्रकांत ठाकरे, जिल्हाधिकारी एस. बुवनेश्वरी, मुख्य कार्यकारी अधिकारी वैभव वाघमारे, उपाध्यक्ष तथा आरोग्य व शिक्षण सभापती चक्रधर गोटे, शिक्षणाधिकारी राजेंद्र शिंदे यांनी शाळेतील सर्व शिक्षकांचे अभिनंदन केले.

साखरा शाळेला बहुमान मिळवण्यासाठी जिल्हा प्रशासनाबरोबर, जिल्हा परिषदेचे सर्व पदाधिकारी, अधिकारी आणि शाळा व्यवस्थापन समितीचे अध्यक्ष राजेंद्र महाले आणि सदस्य, सरपंच अनिता राऊत यांच्यासह ग्रामपंचायतीचे सदस्य आणि मुख्याध्यापक अंबादास कऱ्हे आदींनी परिश्रम घेतले.

या शाळेने राज्यस्तरावर प्रथम क्रमांकाचे ५१ लाखांचे बक्षीस मिळवले आहे. शाळा व परिसराचे सुशोभीकरण, विद्यार्थ्यांचा विविध उपक्रमांत सहभाग, शैक्षणिक गुणवत्ता व व्यक्तिमत्त्व विकासासाठी आवश्यक अवांतर उपक्रम, शाळेची इमारत व परिसराची स्वच्छता, राष्ट्रीय एकात्मतेला प्रोत्साहन देण्यासाठी उपक्रम, विविध क्रीडा स्पर्धा आयोजन, आरोग्य तपासणी, शाळेत प्रथमोपचार पेटीची उपलब्धता, भौतिक सुविधा तसेच अध्यापन व अध्ययनाशी संबंधित आधुनिक साधनांची उपलब्धता, तंबाखूमुक्त, प्लॅस्टिकमुक्त पर्यावरण, शिल्लक अन्न प्रक्रिया विल्हेवाट, शाळेचे माजी विद्यार्थी, पालक, स्थानिक सेवाभावी संस्थांचा शाळा उपक्रमात सहभाग यांसह विविध मुद्यांवर विशेष भर देण्यात आला.