Solapur News : तालुक्याला पुरेसे हक्काचे पाणी मिळण्यासाठी दहिगाव उपसा सिंचन योजनेची पाणी उचलण्याची पाणी पातळीची उंची ४८५ मीटर करण्यात यावी, असा ठराव आमसभेत आमदार नारायण पाटील यांनी मांडला व हा ठराव सर्वानुमते मंजूर करण्यात आला. शुक्रवारी (ता. ३०) धर्मसंगीत मंगल कार्यालयात आयोजित आमसभेत आमदार पाटील बोलत होते. यावेळी तालुक्यातील विविध प्रश्नांवर चर्चा करण्यात आली.

यावेळी तहसीलदार शिल्पा ठोकडे, गटविकास अधिकारी डॉ. अमित कदम, पोलिस निरीक्षक रणजित माने, माजी सभापती गहिनीनाथ ननावरे, माजी सभापती अतुल पाटील, शेखर गाडे, जिल्हा दूध संघाचे माजी संचालक राजेंद्रसिंहराजे भोसले, ‘आदिनाथ’चे उपाध्यक्ष महेंद्र पाटील, माजी जिल्हा परिषद सदस्य सविताराजे भोसले, ॲड. राहुल सावंत, राणा वाघमारे, अतुल खुपसे, बिभीषण आवटे, दादासाहेब पाटील, माजी पंचायत समिती उपसभापती संजय जाधव यांच्यासह नागरिक मोठ्या संख्येने उपस्थित होते.

आमदार पाटील म्हणाले, करमाळा तालुक्यातील पूर्व भागाची वरदायिनी दहिगाव उपसा सिंचन योजना कार्यान्वित झालेली असून, २२ गावांतील १० हजार ५०० हेक्टर क्षेत्र सिंचनाखाली आणण्याचे नियोजन आहे. परंतु उजनी येथील पंपगृहाची पाणी उचलण्याची पाणी पातळीची उंची ४९० मीटर आहे. करमाळा तालुक्याला हक्काचे पाणी मिळत नाही.

भीमा-सीना बोगदा ४८८.२० मीटर, मराठवाड्यासाठी जाणाऱ्या बोगद्याची उंची ४८७ मीटर आहे. या योजनेची पाणी उचलण्याची पातळी दहिगाव उपसा सिंचन योजनेपेक्षा खाली असल्याने दहिगाव योजना लवकर बंद होते. करमाळा तालुक्याला हक्काचे पुरेसे पाणी मिळण्यासाठी दहिगाव उपसा सिंचन योजनेची पाणी उचलण्याची पाणी पातळी उंची ४८५ मीटर करणे गरजेचे आहे. या सभेचे सुनील तळेकर यांनी सूत्रसंचालन केले.

अधिकाऱ्यांविरुद्ध निलंबनाचा ठराव मंजूर

पाणीपुरवठा विभागाचे उपअभियंता निहाल शेख, कनिष्ठ अभियंता बी. डी. वायकर, कनिष्ठ अभियंता जी. बी. खत्री यांना लोकांनी विचारलेल्या प्रश्नांची समाधानकारक उत्तरे देता आली नाहीत. त्यामुळे सभेत त्यांच्या विरोधात सूर दिसून आला. आमसभेत या अधिकाऱ्यांविरोधात निलंबनाची कारवाई करण्याचा ठराव मंजूर करण्यात आला आहे.