Amravati News : दारिद्र्यरेषेखालील नागरिकांना अंत्योदय योजनेंतर्गत शासकीय स्वस्त धान्य दुकानातून देण्यात येणाऱ्या धान्यपुरवठ्यातील साखर गेल्या सहा महिन्यांपासून बेपत्ता आहे. तर, गव्हाची १० किलोने कपात करण्यात आली असून त्याऐवजी ज्वारी देण्यात येत आहे. सणासुदीला वितरित होणारा आनंदाचा शिधाही पूर्ण न आल्याने गौरी-गणपतीच्या मुहूर्तावर वितरित होऊ शकला नाही.

अंत्योदय योजनेंतर्गत जिल्ह्यातील १.२७ लाख लाभार्थींना दरमहा ३६ किलो धान्य अल्प दराने देण्यात येते. यामध्ये एक किलो साखर, १५ किलो गहू व २० किलो तांदळाचा समावेश आहे. स्वस्त धान्य दुकानातून वितरित होणाऱ्या माहवारी रेशनमधून गेल्या सहा महिन्यांपासून साखर लाभार्थ्यांना मिळू शकलेली नाही.

शासनाकडून पुरवठा बंद असल्याने दुकानदार ते देऊ शकले नसल्याने लाभार्थी वंचित झाले आहेत. हा पुरवठा कधी होईल, याची माहिती पुरवठा विभागातूनही मिळाली नाही. दरमहा दिल्या जाणाऱ्या १५ किलो गव्हात कपात करण्यात आली आहे. लाभार्थ्यांना गेल्या महिन्यापासून पाच किलो गहू देण्यात येत आहेत. गव्हाऐवजी १० किलो ज्वारी वितरित करण्यात येत आहे.

शासनाने नुकतीच ज्वारी खरेदी केली. ती साठवून ठेवण्याची पंचाईत असल्याने ज्वारी रेशनकार्डवर लाभार्थ्यांना देण्यात येऊ लागली आहे. तांदळाचा मात्र नियमित कोटा मिळत आहे. एका कार्डवर वीस किलो तांदूळ देण्यात येत आहेत.

मुहूर्तावर देण्याची घोषणा हवेतच

सणासुदीत लाभार्थ्यांना आनंदाचा शिधा देण्याची राज्य सरकारची घोषणा गौरी-गणपतीच्या मुहूर्तावर मात्र हवेत विरली आहे. आनंदाच्या शिधात रवा, साखर, चणाडाळ व तेल असे साहित्य दिले जाते. सध्या पुरवठा विभागाकडे फक्त तेल व रवा आला आहे. साखरेचा पुरवठाच नाही. चणाडाळ आली नसल्याने किट्स वितरित करता आलेल्या नाहीत. त्यामुळे या आनंदाच्या शिधाची प्रतीक्षा कायम आहे.