Nanded News : नांदेड विभागात मागील अडीच महिन्यापासून पावसाने पाठ फिरविली आहे. यासोबतच उसावर किडींचा प्रादुर्भाव झाल्यामुळे नांदेड विभागात ऊस गाळपात १० ते १५ टक्के घट होण्याची शक्यता नांदेड येथील प्रादेशिक सहसंचालक (साखर) कार्यालयाने व्यक्त केला आहे.

प्रादेशिक सहसंचालक (साखर) कार्यालयाने नांदेड विभागाअंतर्गत येणाऱ्या नांदेड, लातूर, परभणी व हिंगोली या चार जिल्ह्यांत चालू गाळप हंगाम २०२३-२४ मध्ये एक कोटी १२ लाख टन उसाचे गाळप होईल, असा अंदाज व्यक्त केला होता.

यात लातूर जिल्ह्यात ४६ लाख टन, परभणी जिल्ह्यात ३१ लाख टन, नांदेड जिल्ह्यात २४ लाख टन तर हिंगोली जिल्ह्यात १३ लाख टन उसाचे गाळप होईल, असे नांदेड येथील प्रादेशिक सहसंचालक (साखर) कार्यालयाने साखर आयुक्तालयाला कळविले होते.

परंतु मागील अडीच महिन्यापासून पावसाने दडी मारल्यामुळे उसाच्या वाढीवर परिणाम झाला आहे. यासोबतच अनेक ठिकाणी उसावर रसशोषण करणाऱ्या किडींचाही प्रादुर्भाव झाला आहे. यामुळे उसाच्या वजनात घट येत आहे. उसाच्या वजनात येणारी घट लातूर तसेच परभणी जिल्ह्यात सर्वाधीक असेल, अशी शक्यता व्यक्त होत आहे.

या भागात पावसाचे प्रमाण इतर जिल्ह्याच्या तुलनेत खूपच कमी नोंदले आहे. यामुळे साखर उद्योग यंदा अडचणीत सापडला आहे. पावसाअभावी, उसाच्या नवीन लागवडीही घटल्या आहेत. तर अनेकांनी खोडवेही काढून ऊस घेणे बंद केले आहे. यामुळे पुढील हंगामातही उसाची चनचन कारखान्यांना जाणवणार आहे.

यंदा नांदेड विभागात २९ साखर कारखान्यांनी गाळपाला सुरुवात केली आहे. उसाअभावी चालू हंगाम दोन ते अडीच महिन्यात आटोपण्याची शक्यता व्यक्त होत आहे. उसाची अशी परिस्थिती आणखी तीन वर्ष राहील, अशी शक्यता या क्षेत्रातील तज्ज्ञांनी व्यक्त केली आहे.