Chandrapur News : फळ आणि भाजीपाला पिकाखालील क्षेत्रात सातत्याने वाढ होत आहे. शाश्‍वत उत्पन्नाचा स्रोत याद्‍वारे प्राप्त होत असल्याने शेतकरी अशा व्यावसायिक पिकांच्या लागवडीवर भर देत आहेत.

त्यातूनच रोपवाटिकेतील फळ आणि भाजीपाला रोपांना मागणी वाढती आहे. त्या पार्श्‍वभूमीवर युवकांनी रोपवाटिका उद्योगक्षेत्रातील संधी ओळखत कार्य करण्याची गरज असल्याचे मत वरोरा येथील आनंद निकेतन कृषी महाविद्यालयाचे प्राचार्य डॉ. सुहास पोतदार यांनी व्यक्‍त केले.

आनंद निकेतन कृषी महाविद्यालय, महाराष्ट्र राज्य फलोत्पादन आणि औषधी वनस्पती मंडळ पुणे तसेच कृषी विभाग यांच्या संयुक्‍त सहकार्याने आयोजित फळे व भाजीपाला रोपवाटिका व्यवस्थापन या विषयावरील प्रशिक्षण वर्गाच्या उद्घाटन प्रसंगी ते बोलत होते. केव्हीकेचे तज्ज्ञ सूचित लकडे, सहाय्यक प्राध्यापक मिली पुसदेकर, रासेयोचे कार्यक्रम अधिकारी राहुल तायडे यांची यावेळी उपस्थिती होती.

तीन दिवस आयोजित या प्रशिक्षण वर्गात जिल्ह्यातील एकूण २६ प्रशिक्षणार्थी सहभागी झाले होते. रोपवाटिका व्यवसायातील संधी व आव्हाने, रोपवाटिकेतील माध्यमे व त्यांचे निर्जंतुकीकरण, प्रमुख फळे व भाजीपाला पिके यांचे रोपवाटिका व्यवस्थापन, रोपवाटिकेतील पीक संरक्षण, पोषण व्यवस्थापन, रोपवाटिकेसाठी शासनाच्या विविध योजना, शासकीय परवाने, रोपवाटिकांचा आर्थिक ताळेबंद अशा विविध बाबींवर प्रशिक्षण वर्गात मार्गदर्शन करण्यात आले.

यासोबतच रोपवाटिकेत वाफे तयार करणे, आंबा, पेरू इत्यादी फळपिकांचे विविध पद्धतीने कलम तयार करणे, याविषयी प्रात्याक्षीक दाखविण्यात आले. यावेळी प्रशांत राखोंडे, नितीन गजभे, डॉ. अनिल भोगावे, डॉ. रविशंकर पारधी, मारुती वरभे यांनी मार्गदर्शन केले.

रोपवाटिकेला भेट

प्रशिक्षणाअंतर्गंत एकर्जुना येथील तालुका फळरोपवाटिका, महाविद्यालयातील सेंद्रिय शेती निविष्ठा उत्पादन या ठिकाणी प्रक्षेत्र भेट आयोजित करण्यात आली.