Chh. Sambhajinagar News : मराठवाड्यातील छत्रपती संभाजीनगर, जालना व बीड या तीनही जिल्ह्यांत काही भागांत शनिवारी सकाळपर्यंतच्या २४ तासांत हलका ते मध्यम पाऊस झाला. काही ठिकाणी पावसाचा जोर अधिक होता, त्यामुळे ओढे व नाल्यांना पाणी आले आहे.

मिळालेल्या माहितीनुसार, जालना जिल्ह्यातील जाफराबाद तालुक्यात जोरदार पाऊस झाला. घनसावंगीत मध्यम स्वरूपाचा पाऊस. कुंभार पिंपळगाव परिसरात दिवसभर ऊन-पावसाचा खेळ कधी जोराचा पाऊस, तर कधी ऊन अशी स्थिती होती.

रोहिलागड परिसरातील किनगाव, किनगाववाडी, नांदी, धनगर पिंपळगाव परिसरात शुक्रवारी दुपारी तीन ते पाचच्या दरम्यान वादळी वाऱ्यासह जोरदार पावसाने हजेरी लावल्याने परिसरात शेतशिवाराला तळ्याचे स्वरूप आले होते. कडवंची येथे १४ मिलिमीटर, नंदापूर ११ मिलिमीटर, खरपुडी १७.६० मिलिमीटर तर पोकळ वडगाव येथील ८.३० मिलिमीटर पावसाची नोंद झाली.

छत्रपती संभाजीनगर जिल्ह्यात सरासरी १६.९ मिलिमीटर पाऊस झाला. बीड व जालनाच्या तुलनेत संभाजीनगरमध्ये पावसाचा जोर अधिक होता. जिल्ह्यातील छत्रपती संभाजीनगर शहरात सायंकाळी ६.३० च्या सुमारास मेघगर्जनेसह पाऊस झाला. आळंद परिसरात अर्धा तास रिमझिम पाऊस झाला.

घाटनांद्रा परिसरात मॉन्सूनच्या पावसाची वादळी वाऱ्यासह जोरदार हजेरी लागल्याने शेतकऱ्यांमध्ये आनंदाचे वातावरण होते. वैजापूर शहरासह तालुक्यात जोरदार पाऊस झाला. पैठण तालुक्यातील देवगाव येथे सुमारे ४५ मिलिमीटर पावसाची नोंद झाली आहे.

बीड जिल्ह्यातील बीड व केज तालुक्यांत पावसाचा जोर अधिक होतात. बीड तालुक्यात सरासरी १५.९ मिलिमीटर, तर केज तालुक्यात सरासरी १२.३ मिलिमीटर पाऊस झाला. त्या पाठोपाठ शिरूर कासार तालुक्यात ११.४ मिलिमीटर, आष्टी ७.७ मिलिमीटर, पाटोदा ६.४ मिलिमीटर, वडवणी ५.५ मिलिमीटर, माजलगाव ४.८ मिलिमीटर, परळी ३.९ मिलिमीटर तर धारूर तालुक्यात सरासरी ३.४ मिलिमीटर पावसाची नोंद झाली. गेवराई व अंबाजोगाई तालुक्यात पावसाची तुरळक सर झाली.