Sangli Rain News : सांगली जिल्ह्यात दोन दिवसांपासून हलक्या पावसाने हजेरी लावली. गेल्या चोवीस तासांत ३२ मिमी पावसाची नोंद झाली. बुधवार (ता. २८) सकाळपासून पावसाने उघडीप दिली असून दुपारपर्यंत ढगाळ वातावरण होते. शेतकरी खरीप हंगामातील पिकांची टोकणी आणि पेरणीसाठी नियोजन करू लागला आहे.

जिल्ह्यात गेले दोन दिवस सर्वदूर हलका आणि मध्यम पाऊस पडला. शिराळा तालुक्यातील धरणक्षेत्रातही चांगला पाऊस झाला. त्यामुळे या भागातील भात पिकास नवसंजीवनी मिळाली आहे. मात्र, भाताची उगवण फारशी झाली नसल्याने शेतकरी चिंताग्रस्त आहे.

दुबार पेरणी करावी लागण्याची स्थिती सध्यातरी नसल्याने शेतकऱ्यांनी सांगितले. दरम्यान, जिल्ह्यात मंगळवारी (ता. २७) थांबूनथांबून पाऊस पडला. बुधवारी दुपारपर्यंत ढगाळ वातावरण होते.

पावसाने काही प्रमाणात उघडीप दिल्याने शेतकरी खरीप हंगामातील सोयाबीन, भुईमूग या पिकांसह अन्य पिकांच्या पेरणी आणि टोकणीसाठी नियोजन करू लागला आहे.

कृषी निविष्ठा केंद्रांतून बियाणे खरेदीची लगबग सुरू आहे. वाफसा आल्यानंतर टोकणी आणि पेरणी केली जाण्याची शक्यता आहे.

जिल्ह्यात गेल्या चोवीस तासांत ३२ मिमी पावसाची नोंद झाली. शिराळा तालुक्यात सर्वाधिक पावसाची नोंद झाली. तालुकानिहाय चोवीस तासांत झालेला पाऊस (मिलिमीटरमध्ये) मिरज ३०.६, जत ४०.८, विटा २८.४, वाळवा २५, तासगाव ४१.५, शिराळा ४७.९, आटपाडी २६.८, कवठे महांकाळ २३.४, पलूस २४, कडेगाव ३०.१ मिमी.