Hingoli News: हिंगोली जिल्ह्यातील वारंगाफाटा (ता. कळमनुरी) येथे तसेच परिसरात रविवारी (ता.१८) मध्यरात्रीच्या सुमारास जोरदार वाऱ्यासह पूर्वमोसमी पावसाने हजेरी लावली. या पावसात बागांतील केळीची झाडे मोडून पडल्याने शेतकऱ्यांचे मोठे आर्थिक नुकसान झाले आहे.

रविवारी सोसाट्याच्या वाऱ्यासह जोरदार पाऊस झाला. केळी बागा, आंबा तसेच इतर फळपिकांची झाडे मोडून पडली. शेतातील आखाड्यावरील पत्रे उडून गेले. झाडांच्या फांद्या मोडून पडल्या. हळद, भुईमूग आदी पिकांचे देखील नुकसान झाले आहे.

अशोक पतंगे, सुवर्णमाला कदम, प्रशांत कदम, अशोक पतंगे, पुष्पाबाई पतंगे, सदाशिव कदम आदींसह अनेक शेतकऱ्यांच्या केळी बागांचे मोठे नुकसान झाले आहे. नुकसानीचे पंचनामे करून बाधित शेतकऱ्यांना मदत द्यावी, अशी मागणी शेतकऱ्यांनी तहसीलदारांकडे करण्यात आली आहे.