Yavatmal News : विनापरवाना शेतकऱ्यांकडून शेतीमाल खरेदी केला जात असल्याचा प्रकार पुढे आला आहे. यात शेतकऱ्यांचे नुकसान होण्याचे प्रमाण जास्त आहे. त्यामुळे सहकार विभाग अ‍ॅक्शन मोडवर आला आहे. विना परवाना शेतीमाल खरेदी करणाऱ्यांवर सहकार विभागाने धाडसत्र सुरू केले असून, जिल्हाभरात मोहीम राबविली जाणार आहे.

शेतीमाल बाजारात यायला सुरुवात झाली असून, त्यामुळे काही व्यापारी विना परवाना शेतकऱ्यांकडून मोठ्या प्रमाणात शेतीमालाची खरेदी करताना दिसत आहेत. यात शेतकऱ्यांची फसगत होण्याची भीती आहे. शेतकऱ्यांकडून धान्य खरेदी करणाऱ्या व्यापाऱ्यांनी बाजार समितीच्या यार्डामधूनच शेतकऱ्यांचा शेतीमाल खरेदी करावा, असा नियम आहे.

यामुळे शेतकऱ्यांची फसवणूक होण्याची शक्यता कमी असते. यातून बाजार समितीला शुल्क मिळते. अनेकांजवळ शेतीमाल खरेदीबाबतचा परवाना घेतलेला नाही. शेतकऱ्यांची अडचण होऊ नये, बाजार समितीला शुल्क मिळावे, यासाठी सहकार विभाग अ‍ॅक्शन मोडवर आला आहे.

शेतकऱ्यांचा शेतीमाल बाजार समितीच्या यार्डात याव्यात, यासाठी विना परवाना धान्य खरेदी करणाऱ्यांवर लक्ष केंद्रित केले आहे. वणी विभागातून कारवाईला सुरुवात करण्यात आली आहे. विना परवाना खरेदी करणाऱ्यांवर साहाय्यक निबंधक कार्यालयाने सोमवारी (ता.२०) कारवाई केली आहे. मंगळवारी (ता.२१) काही ठिकाणी सहकार विभागाने धाडसत्र राबविल्याची माहिती आहे.