Jalgaon News : सातपुडा पर्वतात वणवे पेटण्यास या महिन्याच्या अखेरीस मागील वेळेस सुरवात झाली होती. यात दरवर्षी मौल्यवान वनसंपदेची हानी होत असून, वणवे पेटण्याचे प्रकार थांबविण्यासाठी ठोस उपाय, धोरण किंवा योजना हवी, असा मुद्दा पर्यावरणप्रेमी उपस्थित करीत आहेत.

खानदेशात नंदुरबारातील अक्कलकुवा, धडगाव, शहादा, तळोदा, धुळ्यातील शिरपूर, जळगावमधील चोपडा, यावल व रावेर या भागालगत सातपुडा पर्वत आहे. सातपुड्याच्या पलिकडे मध्य प्रदेश आहे. यावल अभरारण्याचा ठेवा याच सातपुडा भागात आहे.

त्यासंबंधी अनेक घोषणा, योजना आहे. वन विभागाचा मोठा ताफा सातपुड्याच्या सुरक्षेसाठी आहे. परंतु वणवे दरवर्षी पेटतात. त्यावर नियंत्रण आले की वन विभाग पुढे शांत होतो. पण वणवे का पेटतात की जाणीवपूर्वक पेटविले जातात,

याचा शोध घेतला जात नाही. अमूल्य डिंक निर्मितीसाठी हे वणवे पेटविले जातात. झाडांना आग लावल्यास डिंक चांगला तयार होतो, असा समज चोरट्या, माफिया मंडळीत आहे. तसेच काही वृक्ष पेटल्यानंतर त्यांची कत्तल करून वाहतूकही सोपी होते.

यामुळे हे वणवे दरवर्षी पेटतात, असा दावा जाणकार, पर्यावरणप्रेमी करतात. काही स्वयंसेवी संस्था सातपुड्याच्या संरक्षणासाठी प्रयत्नशील आहेत. परंतु अवैध वृक्षतोड सुरूच आहे. अनेकदा सागवान व अन्य जातीच्या वृक्षांचे बाजारात मागणी असलेले लाकूड जप्त केल्याच्या घटना यावल, चोपडा, रावेर भागात घडतात. कमाल भाग सातपुड्यात बोडका झाला आहे.