Dindori News : तालुक्यात गतवर्षी पेक्षा यंदा शेवटच्या टप्प्यात मुसळधार पाऊस झाला असला तरी, सुरवातीला तीन महिने समाधान कारक पाऊस नसल्याने खरिपाचा हंगाम हातून गेला. मात्र मुसळधार पावसाने नदी, नाले ओहोळ खळखळून वाहू लागले आहेत.

त्यामुळे खरिपाचा हंगाम हातून गेला तरी रब्बी हंगामातील पिकांच्या क्षेत्रात चाळीस टक्क्याने वाढ होण्याची चिन्हे दिसू लागली आहेत.परतीच्या पावसाने जोरदार सलामी दिल्यानंतर वाघाड,पुणेगाव, पालखेड तसेच कधी न लवकर भरणारे या वर्षी तिसगाव धरण शंभर टक्के भरले आहे.

तसेच करंजवण, ओझरखेड ही धरणे भरण्याच्या मार्गावर आहेत.त्यामूळे उन्हाळ्यात होणारी पाणी टंचाईची झळ यावर्षी बसणार नाही.या धरणांवर फक्त दिंडोरी तालुकाच अवलंबून नाही तर येवला, निफाड, नांदगाव काही प्रमाणात कोपरगावचा भाग सुद्धा अवलंबून आहे.

पालखेड बंधाऱ्याची साठवण क्षमता ७५० एमसीएफटी असली तरी सध्या या धरणातून एक मोरी व डाव्या कालव्यातून पाणी सुरू आहे. धरणांचा मृत साठा- १.७९ मीटर इतका असला तरी मोठ्या प्रमाणात गाळ साचला आहे. मागील उन्हाळ्यात काही गाळ काढण्याचे काम करण्यात आले होते.

त्यामुळे वरुण आलेला पाणीसाठा तत्काळ पालखेड धरणातून कादवा नदीला तसेच डाव्या व उजव्या कालव्यातून सोडून जाते. तिसगाव वगळता सर्व धरणांचा पाणी साठा या धरणात वर्ग करता येतो अशी रचना पालखेड धरणांच्या बाबतीत आहे.

वाघाड धरण हे पश्चिम पट्यात येत असल्याने या धरणावर २४ पाणी वाटप संस्था कार्यरत असून दिंडोरी व निफाड तालुक्यातील ओझरमिगचा परिसर ओलीताखाली येतो.करंजवण धरणातून नव्याने मनमाड पाणी योजना सुरू झाली आहे.तर ओझरखेड धरणातून चांदवड तालुक्यातील ५६ खेडी योजना सुरू आहे तसेच तालुक्यातील दिंडोरी व वणीकसबे आदी गावांना पाणीपुरवठा योजना सुरू आहेत.