Sindhudurg News : सिंधुदुर्ग जिल्ह्यातील ४१ भातखरेदी केंद्रांवर आतापर्यंत ४७ हजार ६६१ क्विंटल भातखरेदी झाली आहे. जिल्ह्यातील ३ हजार ५० शेतकऱ्यांनी भातविक्री केली आहे. दरम्यान शेतकऱ्यांनी ऑनलाइन नोंदणीसाठी असलेली मुदत बुधवारी (ता. ३१) संपली असून ती वाढविण्याची मागणी भात उत्पादक शेतकऱ्यांकडून करण्यात आली आहे.

जिल्ह्यात ४४ भातखरेदी केंद्रे मंजूर आहेत. त्यापैकी जिल्ह्यातील ४१ केंद्रांवर भातखरेदी सध्या सुरू आहे. यावर्षी भातपीक कापणीला पावसामुळे विलंब झाला. त्यामुळे जिल्ह्यात भात खरेदीला देखील काहीसा विलंब झाला आहे. तालुका खरेदी-विक्री संघ, विविध कार्यकारी सोसायट्यांच्या माध्यमातून जिल्ह्यात भातखरेदी केली जात आहे.

जिल्ह्यातील ३ हजार ५० शेतकऱ्यांनी आतापर्यंत भातविक्री केली आहे. आतापर्यंत ४७ हजार ६६१ क्विटंल भातखरेदी झाली आहे. गेल्यावर्षीच्या तुलनेत अद्याप ५० टक्केदेखील भातखरेदी झालेली नाही. भातखरेदीपूर्वी शेतकऱ्यांची ऑनलाइन नोंदणी केली जाते.

१५ जानेवारीपर्यत असलेली मुदत वाढवून ३१ जानेवारी करण्यात आली होती. ही मुदतदेखील बुधवारी संपली. मुदत वाढवावी, अशी मागणी भात उत्पादक शेतकऱ्यांकडून केली जात आहे.