Solapur News : येडशी अभयारण्यात वाघाच्या शोधासाठी तब्बल १५ दिवसांपासून प्रयत्नशील असलेली ताडोबाचे पथक अखेर माघारी परतले आहे. आता पुणे येथून तुहीम यांच्या नेतृत्वाखाली सात जणांची नवीन रेस्क्यू पथक येडशी येथे दाखल झाले असून, वाघाला जेरबंद करण्याची जबाबदारी त्यांच्यावर सोपवली आहे.

या पथकाने येथे दाखल होताच, येडशी अभयारण्याजवळील वडजी (जि. धाराशिव) शिवारातील वाघाच्या हालचालींचा मागोवा घेतला असून, वासरावर हल्ला झालेल्या ठिकाणाचीही पाहणी केली.

ताडोबाचे पथक आणि वनविभागाने केलेल्या व्यापक प्रयत्नानंतरही वाघाला जेरबंद करण्यात यश आले नाही. वाघाने दोन-तीन दिवसांच्या फरकाने विविध ठिकाणी जनावरांवर हल्ले केले आहेत.

त्यामुळे स्थानिकांमध्ये भीतीचे वातावरण पसरले आहे, अशा परिस्थितीत पुण्याहून आलेल्या रेस्क्यू पथकाला वाघाच्या हालचालींवर लक्ष केंद्रित करून त्याला जेरबंद करण्याचे ध्येय ठेवण्यात आले आहे.

अप्पर प्रधान वनसंरक्षक (वन्यजीव पश्‍चिम) डॉ. व्ही. क्लेमेंट बेन, मुख्य वनसंरक्षक एन. आर. प्रविण, वनसंरक्षक प्रमोद लाकरा यांनी येडशी अभयारण्याला भेट दिली. त्यांनी वाघाच्या शोध मोहिमेचा आढावा घेतला.