Pune News : पुणे जिल्हा सहकारी दूध उत्पादक संघाच्या वतीने अनुदानित तत्त्वावर शेतकऱ्यांच्या घरी बायोगॅस प्रकल्प साकारणार असल्याचे जिल्हा दूध उत्पादक संघाचे संचालक तानाजी जगताप यांनी परिंचे (ता. पुरंदर) येथे शेतकऱ्यांसाठी आयोजित केलेल्या शिबिरात सांगितले.

या वेळी माजी जिल्हा परिषद सदस्य हेमंतकुमार माहूरकर, युवक राष्ट्रवादी काँग्रेसचे अध्यक्ष पुष्कराज जाधव, माजी पंचायत समिती सदस्य उत्तम धुमाळ, नीलेश जाधव आदी मान्यवर उपस्थित होते.

या वेळी जिल्हा दूध संघांच्या वतीने अनुदानित तत्त्वावर राबविण्यात येणाऱ्या योजनांची माहिती देण्यात आली. त्यामध्ये कडबा कुट्टी मशीन, लॅक्टोमीटर, दूध कॅन, पशुखाद्य, बायोगॅस स्लरी, पशुधन औषधे, मिल्किंग मशीन, मुरघास बॅग व चारा पिकांची माहिती देण्यात आली.

तानाजी जगताप म्हणाले की, दिवसेंदिवस घरगुती गॅसच्या किमती वाढत आहेत बायोगॅस हा शेतकरी कुटुंबाला एक पर्याय असून उपलब्ध शेणाच्या माध्यमातून जळतणाची गरज भागविता येणार असल्याचे सांगून जास्तीत जास्त शेतकऱ्यांनी या योजनांचा लाभ घेण्याचे आवाहन केले आहे.

दूध संघाच्या वतीने गेल्या वीस वर्षांत पहिल्यांदाच शेतकऱ्यांसाठी नावीन्यपूर्ण लाभाच्या योजना सुरू केल्या असल्याचे माजी ग्रामपंचायत सदस्य अनिल जाधव यांनी सांगितले. परिंचे परिसरातील अनेक दूध उत्पादक शेतकऱ्यांनी या शिबिरात सहभाग घेऊन दूध उत्पादन करताना येणाऱ्या अडचणी सांगितल्या.

जिल्हा संघाचे डॉ. अहिरे व डॉ. वीर अमोल सोंडकर यांनी शेतकऱ्यांना मार्गदर्शन केले. या वेळी काळदरी गावचे माजी सरपंच अंकुश परखंडे, हरिदास खैरे, हनुमंत पवार, सुधीर धुमाळ, परिंचे सोसायटीचे अध्यक्ष सुशीलकुमार जाधव, अजय जाधव, उल्हास जाधव आदी मान्यवर उपस्थित होते.