Solapur News : यंदा पावसाने पाठ फिरवल्याने खरीप हंगाम वाया गेला, काही प्रमाणात आलेल्या पिकावर शेतकऱ्यांनी रब्बीच्या आशेने पेरणी केली. मात्र अवकाळीच्या संकटाने घाला घातला आहे. त्यावर कडी म्हणून दूध दर कपातीच्या संकटाने शेतकऱ्यांचे कंबरडे मोडले आहे.

रविवारपासून दूधदरात आणखी कपात केली आहे. सद्यस्थितीला गाईच्या दुधाला प्रतिलिटर २५ रुपये इतका दर करण्यात आला आहे. गेल्या चार महिन्यापासून ही दर कपातीची मालिका सुरू आहे. सरकार मात्र भाकड बैठका घेण्याचा सोपस्कार पूर्ण करत आहे.

गेल्या काही दिवसापासून राज्यात गटबाजीची राजकीय साठमारी, त्याचबरोबर आरक्षणाच्या मागणीसंदर्भात नागरिक आक्रमक आहेत. या एकूण गदारोळात दूध उत्पादक शेतकऱ्यांची सुरू असलेली परवड दुर्लक्षित होत आहे.

का उद्‌भवली परिस्थिती?

केंद्र सरकारने गरज नसताना परदेशातून दुग्धजन्य पदार्थांची केलेली आयात

जागतिक बाजारपेठेत दूध भुकटी, लोणी याच्या घसरलेल्या किमती

राज्यातील दूध व्यवसाय खासगी संघाच्या घशात, नफेखोर धोरणामुळे परिस्थिती बिकट

दुग्ध व्यवसायाची स्थिती

सोलापूर जिल्ह्यात एकूण दुधाळ पशुधन ः ५ लाख ४४ हजार २५८

शासनाकडे जिल्ह्यात प्रतिदिन १२ लाख लिटर दूध होत असल्याची आकडेवारी आहे. मात्र सद्यपरिस्थितीत ही आकडेवारी तकलादू असून, मिळालेल्या माहितीनुसार जिल्ह्यात प्रतिदिन २० लाख लिटरपेक्षा जास्त दूध उत्पादित होत आहे.