Ahilyanagar News : अहिल्यानगर जिल्ह्यात चार दिवसांत झालेल्या मॉन्सूनपूर्व पावसाने ११५ हेक्टर क्षेत्रावर पिकांचे नुकसान झाले असून जवळपास ३५ गावांत फटका बसला आहे. अकोले व नेवासा तालुक्यांत प्रत्येकी एक मृत्यू झाला. अजूनही दोन दिवस अवकाळी पावसाचा अंदाज व्यक्त करण्यात आला आहे.

अहिल्यानगर जिल्ह्यात गेल्या आठवडाभरात मॉन्सूनपूर्व पावसाने नुकसान होत आहे. जिल्ह्यात ९ ते १२ मे या कालावधीत झालेल्या वादळ, पावसाने पाथर्डी, अकोले आणि नगर तालुक्यातील साधारण ३५ गावांत शेती पिकांचे नुकसान झाले. कृषी विभागाकडून मिळालेल्या माहितीनुसार सााधारण २५० शेतकऱ्यांचे ११५.५५ हेक्टरवरील फळबाग, भाजीपाल्यासह चारा पिकांचे नुकसान झाल्याचा प्राथमिक अंदाज आहे.

मॉन्सूनपूर्व पाऊस, गारपीट व वादळाचा तडाखा सुरू आहे. एप्रिलमध्ये तीन वेगवेगळ्या दिवशी अवकाळीचा फटका शेतकऱ्यांना बसला होता. त्यानंतर आता मे मध्येदेखील मॉन्सूनपूर्वचा तडाखा सुरू आहे. मेमध्ये सलग चार दिवस वेगवेगळ्या भागांत पावसाचा तडाखा बसला. विशेषतः पाथर्डी, अकोले आणि नगर तालुक्यात ३५ गावांमधील २५० शेतकऱ्यांचे ११५.५५ हेक्टरमधील पिकांचे नुकसान झाले आहे.

यात १८३ शेतकऱ्यांचे ७० हेक्टर वर ३३ टक्क्यांपेक्षा कमी तर ६७ शेतकऱ्यांचे ४५.५५ हेक्टरवर नुकसान झाल्याचा प्राथमिक अहवाल आहे. त्यात गेल्या चार दिवसांत जिल्ह्यात ९ ते १२ मे या कालावधीत पाथर्डी तालुक्यातील २४ गावांत १०६ शेतकऱ्यांचे ७३.६० हेक्टरवर, अकोले तालुक्यातील सहा गावांत ७३ शेतकऱ्यांचे १८.३५ हेक्टर, अहिल्यानगर तालुक्यातील पाच शेतकऱ्यांचे पाच हेक्टरवर पिकांचे नुकसान झाले आहे.

वादळ व पावसाने प्रामुख्याने आंबा, डाळिंब, मोसंबी, संत्रा, चिकू, लिंब आणि केळी या फळबागांचे सर्वाधिक नुकसान झाले आहे. मका, कांदा, टोमॅटो, उन्हाळी बाजरी, मिरची पिकांचेही नुकसान झाले. नेवासे तालुक्यात ३, कोपरगाव २, अकोले १ आणि शेवगाव तालुक्यातील २ अशा आठ घरांची पडझड झाली आहे. पाथर्डीत दोन म्हशींसह एक गाय दगावली. तर अकोले तालुक्यात झाड पडून एकाचा तर नेवासे तालुक्यात वीज पडून एकाचा मृत्यू झाला.