Pune News: शहरात सलग पाचव्या दिवशी मॉन्सूनपूर्व पावसाने हजेरी लावली. मुळशी तालुक्यातील गिरीवन येथे सर्वाधिक २५.५ तर डुडूळगाव परिसरात २१.५ मिलिमीटर पावसाची नोंद झाली. पुणे शहर परिसरात व पिंपरी- चिंचवड परिसरात पावसाच्या हलक्या सरी पडल्या. तर ग्रामीण भागातही ढगाळ वातावरण असून अधूनमधून पावसाच्या सरी पडत असल्याने शेतकऱ्यांनी खरिपाच्या तयारीला सुरुवात केली आहे.

मे महिन्यात उन्हाचे चटके अंगाची लाहीलाही होत असते. उकाड्याने पुणेकर हैराण होतात. मात्र या वर्षी मे महिन्याच्या पहिल्याच आठवड्यात मॉन्सूनपूर्व पावसाने हजेरी लावली. मागील आठ दिवसांपासून ढगाळ वातावरण आणि हलका ते मध्यम पाऊस पडत आहे. त्यामुळे शहरासह जिल्ह्यात ४३ अंशांपर्यंत गेलेला उष्णतेचा कमाल तापमानाचा पारा ३५ ते ३६ अंशांपर्यंत खाली आला आहे.

किमान तापमानातही घट झाल्यामुळे उकाडा कमी झाला आहे. सध्या किमान तापमान २० ते २५ अंश सेल्सिअसच्या दरम्यान असून रात्री हवेतील गारवा वाढला आहे. तर गुरुवारी (ता. १५) सकाळी आठ वाजेपर्यंत हवेली येथे २०.९ अंश सेल्सिअसची सर्वांत कमी किमान तापमानाची नोंद झाली.

बुधवारी (ता. १४) शहर परिसरात दुपारी हलकासा उन्हाचा चटका जाणवत होता. मात्र, अधून-मधून ढगाळ वातावरण होत होते. पुणे शहरातील हडपसर, मगरपट्टा, विश्रांतवाडी, खराडी, वाघोली या परिसरात पावसाच्या हलक्या सरी पडल्या. तर ग्रामीण भागात भोर, मुळशी, जुन्नर, आंबेगाव, खेड तालुक्यांत पावसाच्या तुरळक सरी पडल्या.

या पावसामुळे शेतकऱ्यांची धांदल उडत असून पिकांच्या नुकसानीत वाढ होत आहे. झालेला पाऊस हा खरिपासाठी पोषक असल्याने शेतकऱ्यांनी शेतात खते टाकणे, नांगरट करणे, कांदा काढणे, बाजरी काढणे अशा कामांना वेग दिला आहे.

प्रमुख केंद्रांमध्ये पडलेला पाऊस (मिलिमीटरमध्ये)

गिरीवन २५.५

डुडूळगाव २१.५

चिंचवड १९.०

भोर १०.५

निमगिरी ९.०

हडपसर २.०

मगरपट्टा ०.५