Latur/Dharashiv News : मागील काही दिवसांपासून मॉन्सूनपूर्व पावसाने थैमान घातले आहे. यामुळे खरीप हंगामातील मशागतीच्या कामाचा खोळंबा झाला असून, दुसरीकडे पाऊस थांबायचे नाव घेत नसल्याची स्थिती आहे.

यात मंगळवारी (ता. २७) दुपारनंतर पावसाने थैमान घातले. सर्वाधिक पाऊस लातूर शहरावर कोसळला. रस्त्यावर मोठ्या प्रमाणात साचले तर अनेक घरांमध्ये पाणी घुसले. जलमय झालेल्या लातूरचे जनजीवन विस्कळीत झाले.

धाराशिव जिल्ह्यातही हा पाऊस झाला. कळंब व वाशी तालुक्यात झालेल्या मुबलक पावसामुळे मांजरा धरणाच्या पाणीसाठ्यात चार दशलक्ष घनमीटरने वाढ झाली आहे. लातूर शहरात दुपानंतर पावसाने जोरदार हजेरी लावली.

पावसामुळे रस्त्यावर मोठ्या प्रमाणात पाणी आले. काही भागांत दुचाकी वाहने पाण्यात वाहून गेली. अनेक घरांमध्ये पाणी घुसले. रात्री उशिरापर्यंत पाण्याचा निचरा करण्याचे काम महापालिका व प्रशासनाकडून सुरू होते.

घरात पाणी घुसल्यानंतर झालेल्या नुकसानीचेही पंचनामे करण्यात येत होते. आमदार अमित देशमुख यांच्यासह खासदार डॉ. शिवाजी काळगे यांनी पाणी घुसलेल्या भागांना भेटी देऊन नागरिकांसोबत संवाद साधला.