Solapur News : मे महिन्यात मोहोळ तालुक्यात पडलेल्या मॉन्सूनपूर्व पावसाने शेतकऱ्यांच्या झालेल्या पिकांच्या नुकसानीचे पंचनामे करण्याचे काम पूर्ण झाले असून, पिके व फळबागांचे सुमारे दोन कोटी रुपयांचे नुकसान झाल्याची माहिती तहसीलदार सचिन मुळीक यांनी दिली.

मोहोळ तालुक्यात १३ मेपासून पावसाला सुरुवात झाली. पावसाबरोबरच मोठ्या प्रमाणात वादळी वारेही झाले होते. वादळी वाऱ्यामुळे केळी, आंबा, डाळिंब या फळबागांसह कांदा, मका या पिकांचेही मोठे नुकसान झाले.

नुकसान झाल्याची माहिती शेतकऱ्यांनी तहसीलदार सचिन मुळीक यांना दिली. तहसीलदार मुळीक यांनी कृषी विभाग व तलाठ्यांना पंचनामे करण्याचे आदेश दिले. महिनाभरापासून पंचनामे चालले. तलाठ्यांनी महसूल प्रशासनाला अहवाल सादर केला.

शेतकऱ्यांनी मॉन्सूनपूर्व पावसामुळे नुकसान झाल्याची माहिती खासदार प्रणिती शिंदे यांना दिली. त्यांनी नुकसानग्रस्त भागांना भेटी दिल्या व विमा कंपनीच्या अधिकाऱ्यांना फोन करून लवकरात लवकर भरपाई देण्याची सूचना केली.

त्यांनी सरकारवरही ताशेरे ओढले होते. पिके व फळबागांच्या नुकसानी बरोबरच महावितरणचे पोलही मोठ्या प्रमाणात पडले होते. आमदार राजू खरे यांनीही जिल्हा नियोजन मंडळाच्या बैठकीत नुकसानीबाबत आवाज उठविला होता. शासनाने नुकसान भरपाईचे दर निश्चित केले आहेत. त्याच अनुषंगाने एक कोटी ८० लाख ३६ हजारांचे एकूण नुकसान झाले आहे.