Dharashiv News : पंतप्रधान नरेंद्र मोदी यांनी पंतप्रधान शेतकरी सन्मान निधी योजनेचा १९ वा हप्ता सोमवारी (ता. २४) वितरित केला आहे. या योजनेअंतर्गत जिल्ह्यातील दोन लाख ३७ हजार ५२१ शेतकऱ्यांच्या खात्यावर प्रत्येकी दोन हजार रुपये जमा झाले आहेत. अठराव्या हप्त्याच्या तुलनेत यावेळी लाभार्थींच्या संख्येत सुमारे तीन हजार ७२६ ने वाढ झाली आहे.

शेतकरी सन्मान निधी योजनेअंतर्गत ऑक्टोबर महिन्यात १८ वा हप्ता शेतकऱ्यांच्या खात्यावर जमा करण्यात आला होता. त्यानंतर १९ व्या हप्त्याची रक्कम कधी जमा होते, याची उत्सुकता लाभार्थींमध्ये होती. जिल्ह्यातील दोन लाख ३३ हजार ७९५ शेतकऱ्यांना योजनेच्या अठराव्या हप्त्याचा लाभ झाला होता.

मागील हप्त्याच्या तुलनेत आता देण्यात आलेल्या १९ व्या हप्त्यावेळी लाभार्थींच्या संख्येत सुमारे तीन हजार ७२६ ने वाढ झाली आहे. दरम्यान, केवायसीअभावी १४०९ लाभार्थी योजनेच्या लाभापासून वंचित राहिले आहेत; तसेच आधार क्रमांक लिंक न केल्यामुळे १४७३ लाभार्थींच्या खात्यावर रक्कम जमा होऊ शकलेली नाही.

याशिवाय जमीन नोंदणी (लॅण्ड सीडिंग) न केलेले ७२८ शेतकरी योजनेच्या लाभास मुकले आहेत. पंतप्रधान शेतकरी सन्मान निधी योजनेची सुरवात २०१९ मध्ये झाली. या योजनेतून पात्र शेतकऱ्यांना तीन हप्त्यांमध्ये दरवर्षी ६ हजार रुपये दिले जातात. दर चार महिन्यांनी लाभार्थींच्या खात्यात दोन हजार रुपयांचा हप्ता जमा केला जातो. आतापर्यंत या योजनेअंतर्गत शेतकऱ्यांना १८ हप्ते मिळाले आहेत.

थोडक्यात महत्त्वाचे...

जिल्ह्यातील दोन लाख ३७ हजार ५२१ शेतकऱ्यांच्या खात्यावर शेतकरी सन्मानचा १९ वा हप्ता जमा.

ऑक्टोबरमधील १८ वा हप्ता दोन लाख ३३ हजार ७९५ चा शेतकऱ्यांना लाभ.

मागील हप्त्याच्या तुलनेत यावेळच्या लाभार्थी संख्येत तीन हजार ७२६ ने वाढ.

केवायसी न केलेले लाभार्थी १४०९.

आधार क्रमांक लिंक न केलेले लाभार्थी १४७३.

जमीन नोंदणी (लॅण्ड सीडिंग) न केलेले लाभार्थी ७२८.