Pune News : खेड तालुक्यात रब्बी हंगामातील बटाटा लागवडीस सुरुवात झाली. पावसाच्या तडाख्याने बटाटाच्या लागवडीस उशीर झाला आहे. पावसाची अनिश्चितता व वातावरणात होणाऱ्या बदलामुळे उत्पन्नावर होत असलेल्या विपरीत परिणामामुळे गेली. काही वर्षांपासून खरीप हंगामात बटाटा पिकांचे क्षेत्र कमी होत. रब्बी हंगामात क्षेत्र वाढत असल्याचे दिसून येत आहे.

पावसाची अनिश्चितता व वातावरणात झपाट्याने होणाऱ्या बदलामुळे खरीप हंगामात बटाटा पिकापासून तुलनेने कमी उत्पन्न मिळते. बटाटा बियाणाचे वाढलेले दर व बटाटा बियाणात होणारी फसवणूक पाहता गेली काही वर्षांपासून खरीप बटाटा पिकाकडे काणाडोळा केला जातोय. त्या ऐवजी रब्बी हंगामात बटाटा लागवड केली जातेय.

चास-कमान धरणामुळे रब्बी हंगामात हमखास पाणी उपलब्ध होत असल्याने रब्बी हंगामात बटाटा पिकाकडे कल वाढला आहे. गेली वर्षभर बटाटा पिकास चांगला बाजारभाव राहिल्याने शेतकरी बटाटा लागवडीस प्राधान्य देताना दिसतो आहे. सद्यःस्थितीत आखरवाडीस बहिरवाडी, बुटेवाडी, कमान, चास येथे शेतकरी बटाटा लागवड मोठ्या प्रमाणावर करताना दिसत आहेत.

आखरवाडी येथील प्रगतिशील शेतकरी मच्छिंद्र मुळूक यांच्या शेतात बटाटा लागवड सुरू असताना त्यांनी सांगितले की, बटाटा लागवडीस मोठ्या प्रमाणावर भांडवल व मनुष्यबळाची गरज असते.

शेतमजुरांची कमतरता असल्याने यंत्राच्या साहाय्याने पद्धतीने बटाटा लागवडी केल्या जात आहेत. कृषी विभागाचे कृषी पर्यवेक्षक विठ्ठल राऊत म्हणाले, ‘‘खेड तालुक्यात २०७५ हेक्टर क्षेत्रावर बटाट्याची लागवड केली जात आहे. आत्तापर्यंत चारशे सत्तावन्न हेक्टर क्षेत्रावर बटाटा लागवड पूर्ण झालेली आहे.’’