Sindhudurg News : जिल्ह्याच्या काही भागांतील काजू बी काळवंडली आहे. ढगाळ वातावरण आणि धुके यामुळे विविध कीड-रोगांचा प्रादुर्भाव काजू पिकावर झाला आहे. दोन फवारण्या घेतलेल्या बागांमध्ये देखील कीड-रोग दिसून येत असल्यामुळे काजू उत्पादकांमध्ये चिंतेचे वातावरण आहे.

जिल्ह्यात यावर्षी काजू हंगाम लांबणार आहे. मात्र चांगल्या थंडीमुळे यावर्षी काजूला चांगली पालवी आणि मोहरदेखील आला. त्यामुळे मोठ्या उत्पादनाची अपेक्षा शेतकऱ्यांना आहे. परंतु डिसेंबरमध्ये जिल्ह्यात पावसाचे वातावरण निर्माण झाले.

त्यानंतर आठ ते दहा दिवस ढगाळ वातावरण राहिले. याशिवाय जिल्ह्याच्या अनेक भागांत दाट धुके देखील होते. त्याचा परिणाम आता काजू बीवर दिसून येत आहे. काही भागांतील कोवळी काजू बी काळवंडत आहे.

याशिवाय पालवी आणि मोहरावर बुरशीचा प्रादुर्भाव देखील दिसून येत आहे. ज्या शेतकऱ्यांनी दोन दोन फवारण्या घेतल्या त्या शेतकऱ्यांच्या बागांमध्ये हा परिणाम दिसून येत आहे.

त्यामुळे काजू उत्पादकांमध्ये काहीशी अस्वस्थता आहे. कोरोनानतंरचा काळ काजू उत्पादकांसाठी चांगला राहिलेला नाही. काजू उत्पादन, काजुला मिळणारा दर यामुळे बागायतदार आर्थिक संकटात सापडले आहेत.